Qazaqstan men Reseı «Báıterek» ǵarysh keshenin ushyrýdy bir jylǵa shegermek

ASTANA. QazAqparat – Qazaqstan men Reseı Úkimetteri arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý usynyldy. Bul týraly Ashyq NQA saıtynda jarııalanǵan Úkimettiń qaýly-jobasynda jazylǵan, dep habarlaıdy QazAqparat tilshisi.

Eki el arasyndaǵy kelisimge sáıkes «Baıqońyr» ǵarysh aılaǵynan «Báıterek» keshenin ushyrý synaqtary 2023 jyly bastalýy tıis bolatyn. Endi ol bir jylǵa keıinge qaldyrylmaq.

«Qazaqstan Respýblıkasynyń Úkimeti men Reseı Federatsııasynyń Úkimeti orta klasty zymyran-tasyǵyshy bar «Báıterek» ǵarysh zymyran keshenin ushyrý synaqtaryn bastaýdy 2024 jyly qamtamasyz etedi», - delingen ashyq talqyǵa shyǵarylǵan Úkimet qaýlysynyń jobasynda.

Mundaı sheshim álemdegi geosaıası jaǵdaıǵa baılanysty qabyldanǵan.

«Hattamaǵa qol qoıý álemdegi geosaıası jaǵdaıǵa baılanysty orta klasty zymyran-tasyǵyshy bar «Báıterek» ǵaryshtyq zymyran kesheniniń ushyrylym synaqtaryn bastaýdy 2023 jyldan 2024 jylǵa shegerýge múmkindik beredi», - delingen QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın qol qoıǵan qujatta.