Qazaqstan men Reseı «Baıqońyr» keshenin paıdalanýda ekologııalyq qaýipsizdikti qamtamasyz etýdi maqsat tutady
ASTANA. Naýryzdyń 2-si. QazAqparat - Májilistiń Halyqaralyq ister, qorǵanys jáne qaýipsizdik komıteti «Qazaqstan Respýblıkasy men Reseı Federatsııasy arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasy boıynsha qorytyndy shyǵaryp, ony Palata depýtattarynyń qaraýyna usyndy,
dep habarlaıdy QazAqparat.
«Baıqońyr» ǵarysh aılaǵyn odan ári paıdalanýdy qamtamasyz etý jónindegi birlesken qyzmet sheńberinde ózara tıimdi yntymaqtastyqty damytý maqsatynda Qazaqstan Respýblıkasy men Reseı Federatsııasy 2004 jylǵy qańtardyń 9-ynda «Baıqońyr» keshenin tıimdi paıdalaný jónindegi yntymaqtastyqty damytý týraly kelisimge qol qoıǵan.
Kelisimde «Baıqońyr» ǵarysh aılaǵynyń ınfraqurylymyn jańǵyrtýdyń jáne onyń tarıhı mańyzy bar nysandaryn saqtaýdyń mańyzdylyǵy tanylady. Qazaqstandyq jáne reseılik mamandar men uıymdar birlesken jobalardy iske asyrýǵa birdeı sharttarmen qatysatyn bolady.
Qazaqstan men Reseı Kelisim sheńberinde zymyran-ǵarysh qyzmetin júzege asyrýǵa baılanysty ekologııalyq qaýipsizdikti qamtamasyz etý jáne qorshaǵan ortany qorǵaý problemalaryn sheshý jóninde birlesken jumystar júrgizý qajettigin qarastyrady.
Sonymen birge Kelisim «Baıqońyr» ǵarysh aılaǵynda «Báıterek» zymyran-ǵarysh keshenin ázirleýdi jáne qurýdy kózdeıdi.
