Mınıstrlik Qazaqstan–Reseı áskerı jattyǵýyna qatysty túsinikteme berdi
ASTANA. KAZINFORM — Qazaqstan men Reseı áýe qorǵanysy boıynsha birlesken jattyǵý ótkizip jatyr. Qorǵanys mınıstrligi taratqan resmı aqparatqa sáıkes josparly áskerı jattyǵý 20 aqpanda bastalyp, 10 naýryzǵa deıin jalǵasady.
Qazaqstan Respýblıkasy men Reseı Federatsııasy Áýe shabýylyna qarsy qorǵanysynyń biryńǵaı óńirlik júıesi boıynsha birlesken is-sharalar josparyna sáıkes 2026 jylǵy 20 aqpan men 10 naýryz aralyǵynda Áýe shabýylyna qarsy qorǵanys áskerleriniń josparly jattyǵýy ótkizilip jatyr.
— Jattyǵý barysynda áýe nysandaryn anyqtaý jáne súıemeldeý, áýe keńistigin buzǵan áýe kemelerin ustap qalý, sondaı-aq olardy belgilengen áýeaılaqtarǵa qonýǵa májbúrleý mindetteri pysyqtalyp jatyr. Іs-shara josparly sıpatqa ıe jáne áýe shabýylyna qarsy qorǵanystyń kezekshi kúshteriniń ózara is-qımyl deńgeıin, jaýyngerlik mashyǵyn jáne daıyndyǵyn arttyrýǵa baǵyttalǵan. Azamattar men buqaralyq aqparat quraldary ókilderinen tek resmı aqparat kózderine senip, rastalmaǵan málimetterdi taratpaýyn suraımyz, — delingen vedomstvo habarlamasynda.
Budan buryn Qorǵanys mınıstrligi áskerge shaqyrý tártibi men oǵan qatysty zańsyzdyqtar týraly eskertkenin jazǵanbyz.