Qazaqstan men Reseı Astrahan men Oraldaǵy konsýldyq statýsyn kóterdi

MÁSKEÝ. QazAqparat – Qazaqstan men Reseı syrtqy saıası vedomstvolarynyń basshylary halyqaralyq jáne aımaqtyq yntymaqtastyqtyń ózekti máselelerin talqylap, sondaı-aq eki eldiń Astrahan jáne Oral qalalaryndaǵy konsýldyqtarynyń statýsyn kóterýge kelisti, dep habarlaıdy QazAqparat tilshisi.

Búgin Máskeý qalasyna jasaǵan sapary barysynda QR Syrtqy ister mınıstri Muhtar Tileýberdi reseılik áriptesi Sergeı Lavrovpen eki jaqty kezdesý ótkizdi. Taraptar saıası jáne ekonomıkalyq salalardaǵy eki jaqty yntymaqtastyqtyń qazirgi jaǵdaıy men bolashaǵyn talqylap, halyqaralyq kún tártibiniń mańyzdy máseleleri boıynsha pozıtsııalaryn ekshedi jáne aımaqtyq jáne jahandyq qaýipsizdikti qamtamasyz etýge, sondaı-aq koronavırýs ınfektsııasynyń taralýyna qarsy kúreske baǵyttalǵan kúshti úılestirýge qyzyǵýshylyq bildirdi.

Mınıstr M.Tileýberdiniń kezdesý qorytyndylary boıynsha málimdeýinshe, ekijaqty jáne kópjaqty strategııalyq seriktestiktiń barlyq mańyzdy máseleleri talqylandy, sonyń ishinde BUU Bas assambleıasynyń 75-jyldyǵy qarsańynda, sondaı-aq elderdiń halyqaralyq jáne aımaqtyq uıymdardaǵy jumysy jaıly máseleler ortaǵa salynǵan.

«Biz sondaı-aq eki el arasyndaǵy saýda-ekonomıkalyq yntymaqtasty talqyladyq. Qazirgi kezde Qazaqstan Kókshetaý qalasynda kezekti Aımaqaralyq yntymaqtastyq forýmyn ótkizýge daıyndalýda. Bizdiń shekara mańyndaǵy óńirlerimiz yntymaqtastyqtyń jańa joldary men bolashaǵyn talqylaı alady dep oılaımyn», - dep atap ótti M.Tileýberdi.

Koronavırýsqa qarsy reseılik vaktsınanyń Qazaqstanǵa jetkizilýi týraly suraqqa jaýap bergen M.Tileýberdi tamyz aıynyń sońynda Reseı tikeleı ınvestıtsııalar qorymen jetkizilimderdiń kepildendirilgen kólemi týraly memorandýmǵa qol qoıylǵanyn habarlap, Qazaqstanda da vaktsına ázirlenip, ony óndiriske qosý kelesi jyldyń aqpan aıynan josparlanyp otyrǵanyn eske saldy.

Jalpy alǵanda, taraptar mınıstrlikter arasynda ózara yqpaldastyqty odan ári ilgeriletýge ózara nıetin rastap, qazaqstandyq-reseılik qatynastardyń dástúrli joǵary deńgeıin atap ótti.

Bul turǵyda bıylǵy jyldyń kúzinde Kókshetaý qalasynda eki el basshylarynyń qatysýymen ótetin Aımaqaralyq yntymaqtastyq forýmynyń mańyzdylyǵy atap ótildi. Kezdesý qorytyndylary boıynsha QR men RF-da tıisinshe Astrahan jáne Oral konsýldyqtaryn Bas konsýldyqtar dárejesine deıin kóterý týraly kelisimge qol qoıyldy.