Qazaqstan men Reseı áskerıleri birlesken oqý-jaýyngerlik tapsyrmalardy oryndaıdy (FOTO)

ASTANA. QazAqparat - Áskerı yntymaqtastyq sheńberinde Qazaqstan Respýblıkasy men Reseı Federatsııasy Qarýly Kúshteriniń áskerı qyzmetshileri qatysatyn «Ortalyq-2015» komandalyq-shtabtyq oqý-jattyǵýyn ótkizý josparlanýda.

Oqý-jattyǵý «Batys» jáne «Shyǵys» óńirlik qolbasshylyqtarynyń «Oımasha» jáne «Shyǵys» polıgondarynda, sondaı-aq Orynbor oblysynyń «Dongýzskıı» polıgonynda ótedi, dep habarlaıdy QR QM baspasóz qyzmeti.

Qazaqstan jáne Reseı Qarýly Kúshteri bólimi men bólimshesiniń stsenarııi boıynsha shartty qarsylastyń shabýylyn toıtara otyryp, qoıylǵan oqý-jaýyngerlik tapsyrmalardy birlesip oryndaıdy.

Jalpy alǵanda, jaýyngerlerge birneshe taktıkalyq epızod beriledi. Basqarý organdary men bólimderdi jaýyngerlik ázirliktiń joǵary dárejesine keltirý, áskerlerdiń qaıta toptasýy, arnaıy áskerı operatsııany júrgizý jáne quramdastyrylǵan tásilmen marsh jasaý.

Búgin, 2015 jyldyń 10 qyrkúıeginde «Ortalyq-2015» komandalyq-shtabtyq oqý-jattyǵýy qarsańynda tańsáride oqý dabyly boıynsha teńiz jaıaý áskeriniń brıgadasy kóterildi. Belgi boıynsha áskerı qyzmetshiler berilgen shoǵyrlandyrý aýdandaryna bólimshelerdi almastyrýdy júzege asyrdy. Nátıjesinde teńiz jaıaý áskeriniń 1-shi batalony, tankti batalon jáne qamtamasyz etý batalony qalǵandaryna qaraǵanda tapsyrmany úzdik oryndady.

«Ortalyq-2015» oqý-jattyǵýyn ótkizý qyrkúıektiń 14-i men 20-y kezeńinde josparlanǵanyn atap óteıik.