Qazaqstan men Reseı arnaıy ekonomıkalyq aımaqtardy birlesip damytýǵa ýaǵdalasty
ASTANA. KAZINFORM — Qazaqstan men Reseı arasyndaǵy erekshe ekonomıkalyq aımaqtardy damytý jónindegi ózara túsinistik týraly Memorandýmǵa qol qoıyldy, dep habarlaıdy Ónerkásip jáne qurylys mınıstrliginiń baspasóz qyzmeti.
Máskeýde Qazaqstan Respýblıkasynyń Prezıdenti Qasym-Jomart Toqaev pen Reseı Federatsııasynyń Prezıdenti Vladımır Pýtınniń qatysýymen ótken kezdesýdiń aıasynda úkimetaralyq jáne vedomstvoaralyq qujattarmen almasý rásimi ótti. Solardyń ishinde — Qazaqstan Respýblıkasy Ónerkásip jáne qurylys mınıstrligi men Reseı Federatsııasy Ekonomıkalyq damý mınıstrligi arasynda arnaıy jáne erekshe ekonomıkalyq aımaqtardy damytý salasyndaǵy ózara is-qımyl týraly ózara túsinistik jónindegi memorandým bar. Qujat seriktestikti nyǵaıtýǵa jáne ekonomıkalyq aımaqtardy basqarý, ınvestıtsııa tartý, ınfraqurylymdy damytý jáne halyqaralyq yntymaqtastyqtyń jańa túrlerin engizý salasyndaǵy tájirıbe almasýǵa baǵyttalǵan.
Memorandýmǵa qol qoıý — Qazaqstan Respýblıkasynyń Ónerkásip jáne qurylys mınıstri Ersaıyn Naǵaspaev pen Reseı Federatsııasynyń Ekonomıkalyq damý mınıstri Maksım Reshetnıkov arasynda ótken kelissózderdiń nátıjesi.
Kezdesý barysynda taraptar ónerkásiptik jáne ınvestıtsııalyq yntymaqtastyqtyń aǵymdaǵy jaǵdaıy men ony odan ári damytýdyń perspektıvalaryn talqylady.
Qazirgi ýaqytta Qazaqstanda jalpy quny 2 mlrd AQSh dollarynan asatyn 532 joba iske asyrylyp jatqan 16 arnaıy ekonomıkalyq aımaq jumys isteıdi. Olardyń qatarynda reseılik ınvestorlardyń qatysýymen júzege asyrylyp jatqan 12 joba bar.
— Memorandým Qazaqstan men Reseıdiń ekonomıkalyq aımaqtarynyń basqarýshy kompanııalary arasyndaǵy yntymaqtastyqty damytýǵa, birlesken jobalardy qoldaýǵa, sondaı-aq salyqtyq, kedendik jáne ınfraqurylymdyq retteý salasyndaǵy aqparat pen ozyq tájirıbemen almasýǵa baǵyttalǵan. Ersaıyn Naǵaspaev memorandýmǵa qol qoıý ónerkásiptik áriptestikti nyǵaıtýdaǵy mańyzdy qadam ekenin jáne Qazaqstan men Reseı arasyndaǵy strategııalyq ózara is-qımyldy odan ári tereńdetýge yqpal etetin jańa ınvestıtsııalyq bastamalarǵa negiz bolatynyn atap ótti, — delingen habarlamada.
Aıta keteıik, Qasym-Jomart Toqaev pen Vladımır Pýtın kelissózder qorytyndysy boıynsha Qazaqstan Respýblıkasy men Reseı Federatsııasynyń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııaǵa qol qoıdy.
Budan buryn Qazaqstan men Reseı «Soıýz-5» jáne «Báıterek» ushý synaqtary boıynsha komıssııa quratyny habarlandy.