Qazaqstan men Reseı arasyndaǵy janarmaı baǵasy teńesýi múmkin - M.Esenbaev
TANA. 27 qyrkúıek. QazAqparat /Aıdar Ospanalıev/ - Qazaqstan men Reseı arasyndaǵy janarmaı baǵasy kúnderdiń kúninde teńesýi múmkin. Alaıda mundaı jaǵdaı jaqyn kúnderde oryn alady deý durys emes. Búgin Básekelestikti qorǵaý agenttiginiń tóraǵasy Májıt Esenbaev jýrnalısterge bergen suhbatynda málim etti.
Onyń sózine qaraǵanda, qazirgi tańda Qazaqstan men Reseıdegi janarmaı baǵasynyń alshaqtyǵy 40 paıyzdy qurap otyr. «Alaıda bul bizdiń janarmaı naryǵymyzdaǵy jaǵdaıǵa qatysty túıtkildi másele deýge kelmeıdi. Biz bul máselelermen aınalysýdamyz, aldaǵy ýaqytta bul problema sheshimin tabady degen oıdamyn»,-dedi agenttik tóraǵasy.
Onyń sózinshe, janarmaı naryǵyndaǵy jaǵdaıdyń kúrdelenip otyrýynyń basty sebebi - eldegi eskirip, tozyǵy jetken protsessıng ortalyqtarymen baılanysty bolyp otyr. «Bul týraly osyǵan deıin Munaı jáne gaz mınıstri Saýat Myńbaev ta aıtqan bolatyn. Jalpy biz búgingideı qıyn jaǵdaıda bola bermeımiz. Sebebi biz Kedendik odaq aıasynda bir-birimizge qol ushyn sozamyz. Osy rette aıta ketetin másele - jaqynda qabyldanǵan munaı jáne munaı ónimderine qatysty jańa zań bólshek jáne kóterme saýda naryǵyndaǵy deldaldardan arylyp, jaǵdaıdy retteýge yqpal etedi degen oıdamyn», dedi M.Esenbaev.
