Qazaqstan men Reseı arasyndaǵy yntymaqtastyq tereńdeı túsedi - Parlament
ASTANA. 13 maýsym. QazAqparat -Búgin Parlament Senatynyń jalpy otyrysynda palata depýtattary «1992 jylǵy 25 mamyrdaǵy Qazaqstan Respýblıkasy men RF arasyndaǵy dostyq, yntymaqtastyq jáne ózara kómek týraly shartqa ózgerister engizý týraly hattamany ratıfıkatsııalaý týraly» QR Zańyn qabyldady.
Hattamaǵa byltyrǵy jyldyń maýsymynda eki eldiń memleket basshylary Astanada qol qoıǵan bolatyn. Bul rette sharttyń qoldaný merzimin uzartýdyń obektıvti qajettiligi jáne Qazaqstannyń Reseımen yntymaqtastyǵynyń damýy men ıntegratsııalyq birlestikterdiń qurylýy eskerile otyryp, qujattyń birqatar baptary ózekti sıpat berýge baǵyttalǵan.
Atalǵan shart ekijaqty ózara is-qımyldyń negizgi erejeleri, sondaı-aq ıntegratsııalyq birigýler sheńberindegi yntymaqtastyqtyń negizgi baǵyttary kórsetilgen Reseımen yntymaqtastyq jónindegi basty qujat bolyp tabylady. Hattama boıynsha sharttyń mátinine birqatar ózgerister engiziledi. Atap aıtqanda, 34-baptyń jańa redaktsııasymen eki memleket arasyndaǵy yntymaqtastyq salalary edáýir keńeıtiledi. Halyqaralyq qylmysqa, terrorızmge, ekstremızmge, qarýdy jáne esirtkini taratýǵa, kontrabandaǵa jáne mádenı qundylyqtardy zańsyz áketýge qarsy kúrespen qatar, zańsyz kóshi-qon, adam saýdasy salasyndaǵy qaýipsizdikti qamtamasyz etý boıynsha yntymaqtastyq tereńdeı túsedi.
