Qazaqstan men Reseı arasyndaǵy yntymaqtastyq salalary edáýir keńeıedi - Májilis
ASTANA. 30 mamyr. QazAqparat - Búgin QR Parlamenti Májilisiniń jalpy otyrysynda palata depýtattary «1992 jylǵy 25 mamyrdaǵy Qazaqstan Respýblıkasy men RF arasyndaǵy dostyq, yntymaqtastyq jáne ózara kómek týraly shartqa ózgerister engizý týraly hattamany ratıfıkatsııalaý týraly» zań jobasyn maquldady.
Májilis maquldaǵan qujat Senatqa joldanady.
Atalǵan shart ekijaqty ózara is-qımyldyń negizgi erejeleri, sondaı-aq ıntegratsııalyq birigýler sheńberindegi yntymaqtastyqtyń negizgi baǵyttary kórsetilgen Reseımen yntymaqtastyq jónindegi basty qujat bolyp tabylady. Hattama boıynsha sharttyń mátinine birqatar ózgerister engiziledi. Atap aıtqanda, 34-baptyń jańa redaktsııasymen eki memleket arasyndaǵy yntymaqtastyq salalary edáýir keńeıtiledi. Halyqaralyq qylmysqa, terrorızmge, ekstremızmge, qarýdy jáne esirtkini taratýǵa, kontrabandaǵa jáne mádenı qundylyqtardy zańsyz áketýge qarsy kúrespen qatar, zańsyz kóshi-qon, adam saýdasy salasyndaǵy qaýipsizdikti qamtamasyz etý boıynsha yntymaqtastyq tereńdeı túsedi.
Budan bólek, taǵy bir ózgeris boıynsha eger Taraptardyń bir de biri Sharttan shyǵýǵa nıetti ekenin málimdese, onyń qoldanylý merziminiń kelesi onjyldyq kezeńderge avtomatty túrde uzartylý múmkindigi kózdeledi. Hattamany iske asyrý Qazaqstan men Reseı arasyndaǵy ekijaqty yntymaqtastyqtyń damý qarqynyna oń yqpal etpek.
