Qazaqstan men Reseı arasyndaǵy taýar aınalymy artýda
«Ekonomıkalyq zertteýler ınstıtýty» AQ ortalyǵynyń dırektory Dolores Tólebekovanyń atap ótýinshe, Qazaqstan men Reseı strategııalyq seriktester bola otyryp, tıisti kelisimder aıasynda ózderine qabyldaǵan mindettemelerin oryndaýǵa mindetti. Eýrazııalyq ekonomıkalyq odaq týraly shart negizinde taýarlar, qyzmetter, kapıtal jáne jumys kúshiniń erkin qozǵalysy qamtamasyz etiledi.
QR taýar aınalymyndaǵy RF úlesi 2021 jyly 23,9 paıyzdy ($24,2 mlrd), al osy jyldyń 7 aıynda 27,9 paıyzdy ($20,7 mlrd) qurady.
Statıstıkalyq málimetterge súıensek, Qazaqstan men Reseı arasyndaǵy taýar aınalymy artyp kele jatqanyn baıqaýǵa bolady. Jetkizilimderdiń jolǵa qoıylǵan saýda baǵyttary da oń áser etip otyr.
Reseılik taýarlardyń ımport qurylymyna súıensek, eki eldiń saýda qatynastarynyń tyǵyz baılanysy ańǵarylady. Aıta keterligi, Reseıden Qazaqstanǵa ımporttalatyn ónimde kásipkerlerge, halyqqa arnalǵan óńdelgen jáne daıyn taýarlar qomaqty úleske ıe.
Budan basqa, 2021 jyldyń qorytyndysynda Reseı Nıderlandy, AQSh, Shveıtsarııa jáne QHR-men qatar Qazaqstan ekonomıkasyna ınvestıtsııalar kólemi boıynsha alǵashqy bes eldiń qataryna kiredi. Reseıden Qazaqstanǵa tikeleı sheteldik ınvestıtsııalar kólemi bes jyl ishinde 58,3 paıyzǵa - 1,2 mlrd dollardan $1,9 mlrd dollarǵa deıin ósti.
Ekijaqty qatynastardaǵy kez kelgen shekteý sharalary qoldanystaǵy kelisimsharttardy iske asyrý barysynda Qazaqstannyń bıznes-ortasyna teris áser etedi. Tutastaı alǵanda, qazirgi zamanǵy jaǵdaıda óńirlik baılanystar men ıntegratsııalyq protsesterdiń mańyzdylyǵyn túsiný qajet. Olardyń aıasynda halyqaralyq tájirıbe de kórsetip otyrǵandaı, ózara tıimdi qatynastar uzaq merzimdi perspektıva bolyp sanalady.
Qazaqstan úshin óńirlik yntymaqtastyq máselesi erekshe mańyzǵa ıe. Geosaıası jaǵdaılarǵa baılanysty búgingi kúni qıyndyqtar týyndap otyr. Biraq Qazaqstan ekonomıkasy úshin saýdanyń ekonomıkalyq úlesin jete baǵalamaýǵa bolmaıdy.
