Qazaqstan men Reseı arasyndaǵy taýar aınalymy $20 mlrd-qa jaqyndady

PETROPAVL. QazAqparat - Qazaqstan men Reseı taýar aınalymy kólemin 20 mlrd AQSh dollaryna jetkizý kórsetkishine jaqyndady. Bul týraly Qazaqstan men Reseıdiń Óńiraralyq yntymaqtastyǵynyń XV forýmynda Elbasy Nursultan Nazarbaev málim etti,  dep habarlaıdy QazAqparat.

«Bıyldyń 8 aıynda taýar aınalymy 11 mlrd AQSh dollarynan asty, al sońyna qaraı onyń deńgeıi 18 mlrd dollarǵa jetedi dep kútilýde. Osy oraıda 20 mlrd dollarǵa jetkizý maqsatyn eńserip qaldyq. Ózara saýdada óńdelgen taýarlar úlesi artyp kele jatqany qýantady, bul turǵydaǵy kórsetkish 82 paıyzǵa jetti. Reseı Qazaqstan eksporty úshin iri naryq bolyp otyr», - dedi Elbasy.

Reseılik kapıtaldyń qatysýymen Qazaqstanda 9 myńnan astam kásiporyn óziniń qyzmetin tabysty túrde júzege asyrýda. Olar ekonomıkanyń barlyq salasyna úles qosýda.

«Búginde 10 mlrd AQSh dollaryna biz 60-tan astam ınvestıtsııalyq iri jobany júzege asyrdyq. Іske asyrý kezeńinde taǵy da 57 joba tur, olardyń quny 6 mlrd dollarǵa baǵalandy», - dedi N. Nazarbaev.

Olar munaı-gaz, taý-ken metallýrgııalyq keshendi, agroónerkásiptik salada qamtylǵan.

Budan buryn habarlanǵandaı, QR Prezıdenti Qazaqstan men Reseıdiń Óńiraralyq yntymaqtastyǵynyń forýmy óziniń tıimdiligin dáleldegenin atap ótti.