Qazaqstan men Reseı arasyndaǵy ózara saýda kólemi 12,2 mlrd dollardy qurady

NUR-SULTAN. QazAqparat - Qazaqstan Respýblıkasy men Reseı Federatsııasy arasyndaǵy yntymaqtastyq jónindegi Úkimetaralyq komıssııanyń 21-shi otyrysy ótti. Bul jóninde Memlekettik kirister komıtetiniń baspasóz qyzmetine silteme jasap QazAqparat habarlaıdy.

Jıynǵa qazaqstandyq taraptan Premer-Mınıstrdiń birinshi orynbasary - QR Qarjy mınıstri Álıhan Smaıylov, reseılik taraptan - Úkimet tóraǵasynyń birinshi orynbasary - RF Qarjy mınıstri Anton Sılýanov qatysty.

Otyrys barysynda saýda-ekonomıkalyq yntymaqtastyq, otyn-energetıkalyq kesheni, atom energııasyn beıbit paıdalaný, ónerkásip, kólik, aýyl sharýashylyǵy, densaýlyq saqtaý, qorshaǵan ortany qorǵaý, bilim jáne ǵylym, áleýmettik-eńbek qatynastary, aqparattyq tehnologııalar, mádenıet, týrızm, óńiraralyq jáne shekara mańy yntymaqtastyǵyn damytý, sondaı-aq eki eldiń isker toptarynyń ózara qarym-qatynasy salasyndaǵy máseleler talqylandy.

Qazaqstan men Reseı memleketaralyq baılanystardyń barlyq spektri boıynsha ekijaqty ózara is-qımyldyń joǵary deńgeıine ıe. Bul yntymaqtastyqty nyǵaıtý maqsatynda memleket basshylary men ózgede túrli deńgeılerde kezdesýler ótip turady.

Saýda-ekonomıkalyq yntymaqtastyq josparly túrde damyp keledi. Reseı Qazaqstannyń basty saýda seriktesi sanalady (elimizdiń syrtqy saýda aınalymyndaǵy Reseıdiń úlesi - 19,5%).

2018 jyly QR men RF arasyndaǵy ózara saýda kólemi 18,5 mlrd AQSh dollaryn qurady, bul 2017 jylǵa qaraǵanda 13,1%-ke joǵary (16,4 mlrd AQSh dollary). Bıylǵy 8 aıdyń qorytyndysy boıynsha bizdiń elderimiz arasyndaǵy ózara saýda kólemi 0,8%-ke artyp, 12,2 mlrd AQSh dollaryn qurady.

Otyrys barysynda Premer mınıstrdiń birinshi orynbasary, Qarjy mınıstri Álıhan Smaıylov Qazaqstan Respýblıkasynyń tranzıttik áleýetiniń damý qarqynyn sóz etti, mysal retinde «Batys Eýropa - Batys Qytaı» aýqymdy jobasy jaqyn arada aıaqtalatynyn aıtty.

«Sońǵy jyldary « Batys Eýropa - Batys Qytaı» aýqymdy avtomobıl jobasyn aıaqtaý jumysy júrgizildi. Bul joba sátti júzege asqandyqtan elderimiz tranzıt áleýetin tolyq iske asyra alatynyna senimdimin», - dedi Álıhan Smaıylov.

Jıyn qorytyndysy boıynsha Qazaqstan-Reseı Úkimetaralyq komıssııasynyń 21-shi otyrysynyń hattamasyna qol qoıyldy.

Komıssııa 2020 jyly memleket basshylarynyń qatysýymen Qazaqstan men Reseıdiń óńiraralyq yntymaqtastyq forýmy aıasynda Qazaqstan-Reseı Іskerlik Keńesiniń kezekti otyrysyn ótkizýdi usyndy.

Aıta ketý kerek, 2019 jyldyń 6-7 qarashasynda Omby qalasynda (RF) memleket basshylarynyń qatysýymen «Transshekaralyq yntymaqtastyqty damytýdyń ózekti máseleleri» taqyrybynda Qazaqstan men Reseıdiń XVI aımaqaralyq yntymaqtastyq forýmy ótedi.

Sonymen qatar, palatalardyń bıznespen ózara is-qımyly boıynsha jumysty uıymdastyrýda tájirıbe almasýǵa, aımaqtyq deńgeıde yntymaqtastyqty damytýǵa, Qazaqstan men Reseı kásiporyndarynyń kooperatıvti baılanystaryn nyǵaıtýǵa, onyń ishinde úshinshi elderdiń naryǵyna shyǵýǵa erekshe nazar aýdarý qajettigi aıtyldy.

ÚAK kelesi 22-shi otyrysy 2020 jyly Reseı Federatsııasynda ótetin boldy.