Qazaqstan men Reseı arasyndaǵy máńgilik dostyq deklaratsııaǵa qol qoıylǵanyna 20 jyl
ASTANA. QazAqparat - Qazaqstan men Reseı arasyndaǵy HHІ ǵasyrǵa baǵdarlanǵan máńgilik dostyq jáne odaqtastyq týraly deklaratsııaǵa qol qoıylýynyń 20 jyldyǵyna oraı eki eldiń syrtqy ister mınıstrleri quttyqtaý joldaýlarymen almasyp, eki halyqtyń dostyǵyn nyǵaıtý múddesimen kópqyrly yntymaqtastyqtyń damýyn jalǵastyrýǵa senim bildirdi.
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Qazaqstannyń Syrtqy ister mınıstri Qaırat Ábdirahmanov bul mańyzdy qujatqa qol qoıý Qazaqstan men Reseı qatynastarynyń odaqtastyq sıpatyn alǵashqy ret belgilep, bizdiń elder arasyndaǵy yntymaqtastyqtyń úlgili modeliniń nyǵaıýyna jáne jan-jaqty ózara yqpaldastyǵyna jaǵdaı jasaǵandyǵyn aıtty.
«Ótken kezeńde Deklaratsııa bizdiń elderdiń strategııalyq áriptestigi tetiginiń berik negizi boldy jáne búgin Qazaqstan men Reseı arasyndaǵy qatynastar senimmen jáne shıraq damýda, al ózara yqpaldastyq barlyq baǵyttarda tereńdeýde», - dep aıryqsha atap kórsetti Q.Ábdirahmanov.
Óz kezeginde, Reseıdiń Syrtqy ister mınıstri Sergeı Lavrov Deklaratsııanyń negiz bolatyn ıdeıalaryn iske asyrý qazaqstandyq-reseılik qatynastardyń údemeli damýyn, olardyń odaqtastyq pen strategııalyq áriptestiktiń jańa sapaly deńgeıine shyǵýyn qamtamasyz etkenin atap ótti.
Reseı SІM-iniń basshysy óziniń quttyqtaý joldaýynda: «Qazirgi kúrdeli halyqaralyq jaǵdaıda mundaı amal bizge teńgerimdelgen, barynsha kóp dárejede bir-birimizdiń múddelerimizdi eskeretin sheshimder tabýǵa múmkindik beredi», - dep jazdy.
1998 jylǵy 6 shildede eki memleket basshylary Nursultan Nazarbaev jáne Borıs Eltsın Qazaqstan men Reseıdiń máńgilik dostyq dánekerin «ulttyq qaýipsizdiktiń, saıası turaqtylyqtyń, ultaralyq kelisim men eki eldiń órkendeýiniń kepildigi» retinde saqtaıtynyn saltanatty túrde málimdedi.
2018 jylǵy 6 shildede belgili reseılik basylym «Rossııskaıa gazetasynda» Syrtqy ister mınıstri Qaırat Ábdirahmanovtyń Deklaratsııaǵa qol qoılǵandyǵynyń 20 jyldyǵyna arnalǵan maqalasy shyqty. Atap aıtqanda, Mınıstr jańa myńjyldyqta eki eldiń kópqyrly jáne tabysty qatynastarynyń damýynyń sapaly jańa ustanymdary men parametrlerin qalyptastyrǵan Deklaratsııanyń qundylyǵy týraly aıtyp ótti.
Budan ózge, Q.Ábdirahmanov shyn máninde TMD keńistigindegi strategııalyq áriptestik pen odaqtastyq qatynastardyń úlgili modeli dep ataýǵa bolatyn Qazaqstan men Reseıdiń búgingi dostyq qatynastary týraly pikirimen bólisti.
