Qazaqstan men Reseı arasyndaǵy «Baıqońyr» ǵarysh aılaǵyndaǵy apatqa qatysty kelisimge ózgerister engizildi - Májilis

ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «1999 jylǵy 18 qarashada jasalǵan Qazaqstan Respýblıkasynyń Ykimeti men Reseı Federatsııasy Úkimetiniń arasyndaǵy «Baıqońyr» ǵarysh aılaǵynan zymyrandardy jiberý kezinde avarııalar bolǵan jaǵdaıdaǵy ózara is-qımyl tártibi týraly kelisimge ózgerister engizý týraly Hattamany ratıfıkatsııalaý týraly» zań jobasyn maquldady.

Májilis maquldaǵan qujat endi Parlament Senatyna joldanady.

Zań jobasy boıynsha baıandaǵan QR Іshki ister mınıstri Qalmuhanbet Qasymovtyń aıtýynsha, eki el arasyndaǵy kelisimge ózgerister engizilgen Hattamaǵa 2015 jyldyń 2 maýsymynda qol qoıylǵan.

«Qujat negizinen «Baıqońyr» ǵarysh aılaǵynan zymyrandy ushyrý barysynda apattar oryn alǵan jaǵdaıda qurylatyn komıssııalar, birlesken shtabtar men ýákiletti organdardyń quzyretterin naqtylaıtyn bolady. Tutastaı alǵanda, zańnamany qabyldaý qosymsha qarjy shyǵyndaryn talap etpeıdi. Kelisim Qazaqstannyń ulttyq zańnamasyna qaıshy kelmeıdi», - dedi mınıstr Q. Qasymov.

Aıta keterligi, kelisimge ózgerister engizýge Qazaqstan tarapy bastamashylyq jasaǵan. Depýtat ıÝrıı Tımoşenkonyń aıtýynsha, 2006 jyldyń 27 shildesindegi «Baıqońyrdan» ushyrylǵan «Dnepr» RS-20 zymyranynyń apatqa ushyraýy boıynsha oqıǵanyń saldaryn taldaı kele, Qazaqstan úkimetaralyq komıssııa aıasynda kelisimge ózgeris engizý týraly bastama kóterdi. «Óıtkeni, apat saldaryn joıý protsesinde birqatar máseleler týyndaǵan bolatyn. Al ony retteý qoldanystaǵy kelisimderde kórsetilmegen. Soǵan oraı, 2006 jyldan beri eki memleket arasynda kelissózder júrgizilip, 2015 jyly ortaq mámilege kelip, hattamaǵa qol qoıyldy», - dedi depýtat ıÝ. Tımoşenko.

Májilis maquldaǵan zań jobasy Parlament Senatyna joldanady.