Qazaqstan men Reseı arasyndaǵy áskerı-tehnıkalyq yntymaqtastyqty odan ári damytýdy qamtyǵan kelisim qabyldandy - Parlament

ASTANA. 18 sáýir. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Reseı Federatsııasy Úkimeti arasyndaǵy Qazaqstan Respýblıkasynyń jáne Reseı Federatsııasynyń qarýly kúshteri múddelerine áskerı-tehnıkalyq yntymaqtastyq salasyndaǵy birlesken jumystardyń baǵdarlamalaryn ázirleý jáne iske asyrý týraly kelisimdi ratıfıkatsııalaý týraly» zańyn qabyldady.

Atalǵan qujat Qazaqstan men Reseı qarýly kúshteri múddelerinde áskerı-tehnıkalyq yntymaqtastyq salasyndaǵy birlesken jumystardyń baǵdarlamalaryn ázirleýdi jáne iske asyrýdy aıqyndaıdy.

Kelisimniń maqsaty taraptar memleketteriniń qarýly kúshterin qazirgi zamanǵy qarý-jaraqpen jáne áskerı tehnıkamen jaraqtandyrý jónindegi áskerı-tehnıkalyq yntymaqtastyqty odan ári turaqty damytýdy qamtamasyz etý bolyp tabylady.

Bul rette áskerı maqsattaǵy ónimdi jetkizýdiń jedeldigin arttyrý, memleketter arasyndaǵy uıymdardyń óndiristik, eńbek jáne zııatkerlik áleýetin saqtaý qarastyrylady.

Kelisim 2009 jyly 11 qyrkúıekte Orynborda jasalǵan.