Qazaqstan men Reseı arasynda jańa áýe reısteri ashylady
NUR-SULTAN. QazAqparat - QR IIDM Azamattyq avıatsııa komıteti «IrAero» áýe kompanııasyna Qazaqstan Respýblıkasynda akkredıtteý týraly kýáligin berdi, dep habarlaıdy QazAqparat komıtetke silteme jasap.
Reseıdiń «IrAero» áýe kompanııasy Qazaqstan men Reseı arasynda birqatar baǵyttardy ashýdy josparlap otyr.
«Azamattyq avıatsııa komıteti Qazaqstan Respýblıkasynyń aımaqtaryn men Reseı Federatsııasymen áýe qatynasy arqyly baılanystyrý jumysyn jalǵastyrady. Kóktemgi-jazǵy navıgatsııa kezeńinde «IrAero» kelesi baǵyttar boıynsha turaqty áýe tasymalyn oryndaýdy josparlap otyr: Jýkovskıı - Qaraǵandy - Jýkovskıı aptasyna 7 ret; Jýkovskıı - Kókshetaý - Jýkovskıı aptasyna 2 ret; Jýkovskıı - Petropavl - Jýkovskıı aptasyna 2 ret ushyrylady», - delingen komıtet habarlamasynda.
Reıster RRJ (Sukhoi SuperJet-100) áýe kemelerimen ushyrylady. Komıtettiń málimdeýinshe, Qazaqstannyń barlyq halyqaralyq reısteriniń 1/3 bóligi Reseımen baılanysady.
Aıta keteıik, «IrAero» avıakompanııasy 1999 jyly qurylǵan. Negizgi qyzmet túri - Qıyr Shyǵystyń jáne Reseıdiń soltústik-shyǵys oblystarynyń áýe tasymalyn qamtamasyz etý boldy. 2006 jyldan bastap «IrAero» jolaýshylar tasymalymen aınalysady jáne qazirgi ýaqytta aımaqtaǵy eń iri tasymaldaýshy bolyp sanalady.
