Qazaqstan men Reseı arasynda HHІ ǵasyrdaǵy tatý kórshilik pen odaqtastyq týraly shart qabyldandy - Parlament
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasy men Reseı Federatsııasy arasyndaǵy HHІ ǵasyrdaǵy tatý kórshilik pen odaqtastyq týraly shartty ratıfıkatsııalaý týraly» QR Zańy qabyldandy.
Atalǵan shartqa byltyrǵy jyldyń qarashasynda Ekaterınbýrg qalasynda qol qoıylǵan. Sharttyń maqsaty Qazaqstan men Reseıdiń strategııalyq áriptestigin, saıası, saýda-ekonomıkalyq, ǵylymı-tehnıkalyq, energetıka, tranzıt, ekologııalyq, gýmanıtarlyq, mádenı jáne basqa da salalardaǵy yntymaqtastyqty damytý bolyp tabylady.
«Qazaqstan Reseıdi Eýrazııalyq keńistiktegi mańyzdy saıası jáne ekonomıkalyq áriptes retinde qarastyrady. Reseımen kópjaqty josparly qatynastardy damytý elimizdiń strategııalyq múddelerine saı keledi. Bul rette shart Reseımen negiz quraýshy qujattyń biri bolyp tabylady, onda ekijaqty yntymaqtastyqtyń bazalyq prıntsıpteri kórsetilgen», - dedi QR Syrtqy ister mınıstri Erlan Ydyrysov.
Onyń aıtýynsha, qujat aımaqtaǵy beıbitshilik pen qaýipsizdikti nyǵaıtý maqsatynda ózekti halyqaralyq máseleler boıynsha ekijaqty saıası dıalogty damytýǵa qyzmet etip, saýda, ekonomıkalyq qatynastardyń damýyna óz yqpalyn tıgizedi.
Shartqa sáıkes, taraptar kelisilgen syrtqy saıasatty júrgizedi, eýrazııalyq keńistik pen búkil álemde beıbitshilikti nyǵaıtý, turaqtylyq pen qaýipsizdikti arttyrý isinde tyǵyz ózara is-qımyl jasaıdy.
Parlament qabyldaǵan qujat Memleket basshysynyń qol qoıýyna joldanady.
