Qazaqstan men Reseı arasynda ǵarysh keńistigin beıbit maqsattarda zertteý men paıdalanýǵa qatysty qujat jalpy otyrysta talqylanady
ANA. 27 jeltoqsan. QazAqparat /Aıdar Ospanalıev/ - Parlament Senatynyń Halyqaralyq ister, qorǵanys jáne qaýipsizdik komıtetiniń depýtattary búgin keńeıtilgen otyrysta «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy ǵarysh keńistigin beıbit maqsattarda zertteý jáne paıdalaný salasyndaǵy yntymaqtastyq týraly kelisimdi ratıfıkatsııalaý týraly» zań jobasyn talqylady.
Osy zań jobasy boıynsha baıandaǵan Ulttyq ǵarysh agenttigi tóraǵasynyń orynbasary Meıirbek Moldabekovtiń aıtýynsha, búginde ǵarysh salasynda Qazaqstan men Reseı arasynda 40-tan astam ekijaqty kelisimder bar. Alaıda atalmysh kelisimder Baıqońyr ǵarysh aılaǵyn jalǵa berý máselesiniń aınalasynda bolǵan. «Al ǵaryshtyq joǵary tehnologııalarmen almasý birlesken ǵylymı-zertteýler júrgizý, birlesken jobalardy iske asyrý jaǵynan kelgende mundaı tolyqqandy kelisim bolǵan joq. Búgingi talqylaýǵa usynylyp otyrǵan kelisim ǵaryshtyq tehnologııalar almasý tártibin belgileıdi. Sonymen qatar ol qorǵalatyn buıymdar men tehnologııalarǵa qatysty, qupııa aqparattardy paıdalanýdaǵy zııatkerlik menshikke qatysty, sondaı-aq eskporttyq baqylaý men kedendik retteýge qatysty máselelerdi retteý tártibin belgileıdi», - dedi Agenttik tóraǵasynyń orynbasary.
Onyń sózinshe, kelisimdi ratıfıkatsııalaý Keden Odaǵyna jatpaıtyn elderde kedendik taýarlarǵa jeńildik jasaýǵa múmkindik beredi. Kelisim kúshine enetin bolsa, Reseımen birlesken iri jobalardy iske asyrýǵa jaǵdaı týady. Otyrys barysynda qujatty jan-jaqty talqylaǵan depýtattar ony Senattyń jalpy otyrysynda qaraıtyn bolyp sheshti.
