Qazaqstan men Reseı arasyndaǵy taýar aınalymynyń 95%-ǵa jýyǵy ulttyq valıýtalarmen júzege asyrylady

ASTANA. KAZINFORM — Reseı Prezıdenti Vladımır Pýtın halyqaralyq aqparat agenttikteri basshylarymen kezdesý barysynda Qazaqstan men Reseı arasyndaǵy taýar aınalymynyń ósip kele jatqanyn atap ótti, dep habarlaıdy Kazinform tilshisi.

— Biz ósip kele jatqan taýar aınalymyn negizinen — shamamen 95% — ulttyq valıýtalarda júrgizip otyrmyz. Bul — óte jaqsy kórsetkish. Ol bizge taýarlar men qyzmetter úshin aqsha aýdarý men ózara esep aıyrysýdaǵy qıyndyqtarǵa qaramastan, taýar aınalymynyń ósýin báseńdetpeýge múmkindik beredi, — dedi Vladımır Pýtın.

Reseı Prezıdenti sonymen qatar eki el arasyndaǵy gýmanıtarlyq yntymaqtastyqtyń, sonyń ishinde bilim berý salasyndaǵy baılanystardyń belsendi damyp kele jatqanyn aıtyp, aldaǵy ýaqytta da ózara qarym-qatynastar nyǵaıa túsetinine senim bildirdi.

Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly aıtty.

Sondaı-aq Qazaqstanmen qarym-qatynasty damytýda eshqandaı qıyndyq joq ekenin jetkizdi.