Qazaqstan men Reseı arasyndaǵy taýar aınalym kólemi 30 mlrd dollardan asady
ASTANA. KAZINFORM — Qazaqstan men Reseı arasyndaǵy ózara taýar aınalymy jaqyn arada 30 mlrd dollardan asyp túsedi. Bul týraly elimizge memlekettik saparmen kelgen Reseı Prezıdenti Vladımır Pýtınmen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty.
- Ózara taýar aınalymynyń kórsetkishterine toqtalsaq, onyń somasy jaqyn arada 30 mlrd dollardan asatynyna senimdimin. Bul turǵyda Reseı Qazaqstan ekonomıkasyndaǵy eń iri ınvestor ekeni óte mańyzdy, - dedi Qasym-Jomart Toqaev.
Prezıdenttiń aıtýynsha, Reseı ekonomıkasyna salǵan Qazaqstan ınvestıtsııasy 9 mlrd dollardan asty.
- Bul – óte jaqsy kórsetkish, eki el prezıdentteriniń ákimshilikteri men úkimetteriniń birlese atqarǵan jumysynyń nátıjesi. Osy qarqyndy ary qaraı jalǵastyrýǵa ýaǵdalastyq. Búginde ınvestıtsııanyń jalpy kólemi 53 mıllıard dollar bolatyn 177 birlesken jobanyń pýly jasaqtaldy, onyń ishinde 122-si iske asyryldy, ıaǵnı, operatsııalyq kezeńge ótti, - dedi Memleket basshysy.
Buǵan deıin habarlanǵandaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
