Qazaqstan men Reseı arasyndaǵy taýar aınalymy 16% artty
ASTANA. KAZINFORM – 2026 jyldyń qańtar–naýryz aılarynyń qorytyndysy boıynsha Qazaqstan men Reseı arasyndaǵy taýar aınalymy 6,46 mlrd AQSh dollaryna jetip, ótken jyldyń sáıkes kezeńimen salystyrǵanda 16,1% artty.
Saýda jáne ıntegratsııa mınıstrligi málimetinshe, 2025 jyldyń alǵashqy toqsanynda bul kórsetkish 5,56 mlrd AQSh dollaryna teń bolǵan. Reseı Qazaqstannyń negizgi saýda seriktesteriniń biri retindegi ornyn saqtap, ózara saýda kólemi boıynsha ekinshi orynda tur.
Sonymen qatar Reseı ımport pen ónerkásiptik kooperatsııa baǵytyndaǵy mańyzdy naryqtyń biri. Qazaqstannan Reseıge eksport negizinen metallýrgııa jáne shıkizat ónimderi esebinen qalyptasty. Negizgi eksporttyq taýarlar qatarynda ystyqtaı ılektelgen legırlenbegen jalpaq prokat (131,8 mln AQSh dollary), temir keni men kontsentrattary (77,8 mln dollar), qaptalǵan jalpaq prokat (77 mln dollar), sýyqtaı ılektelgen jalpaq prokat (73,3 mln dollar), alıýmınıı oksıdteri men gıdroksıdteri (60,5 mln dollar), tas kómir (40 mln dollar), sondaı-aq óńdelmegen myrysh (39,5 mln AQSh dollary) bar.
2026 jyldyń alǵashqy toqsanynda Reseıden Qazaqstanǵa ımport kólemi 28,5%-ǵa ósip, 4,96 mlrd AQSh dollaryna jetti. Import ósimi strategııalyq mańyzy bar taýarlar men ónerkásip ónimderiniń jetkiziliminiń artýymen baılanysty. Ásirese, ýran ımportynyń kólemi aıtarlyqtaı ósip, 2486 esege artyp, 258,5 mln AQSh dollaryna jetti. Tabıǵı gaz ımporty 93,4%-ǵa ósip, 499 mln dollarǵa jetse, óńdelmegen jáne jartylaı óńdelgen altyn ımporty 36,5 esege ulǵaıyp, 211,2 mln dollar boldy.
Sonymen qatar munaı ónimderi, bıdaı, baǵaly metaldar kenderi men kontsentrattary, sondaı-aq temirjol vagondary ımporty boıynsha da ósim tirkeldi. Ózara saýdanyń oń dınamıkasy Qazaqstan men Reseı arasyndaǵy ekonomıkalyq yqpaldastyqtyń joǵary deńgeıin, óndiristik kooperatsııanyń keńeıýin jáne eki eldiń negizgi salalary ónimderine degen turaqty suranysty kórsetedi.
Aıta keteıik, Reseı 1 maýsymnan bastap taýar jetkizýdi aldyn ala rastaý júıesin mindetti etedi.
