Qazaqstan men Reseı arasyndaǵy saýda aınalymy 11 aıda 24 mlrd dollardan asqan

ASTANA. KAZINFORM – Úkimet basshysy Oljas Bektenov Reseı Federatsııasynyń Premer-mınıstri Mıhaıl Mıshýstınmen kezdesýinde ekijaqty saýda-sattyqtyń jyl saıyn artyp kele jatqanyn málim etti.

- Eki eldiń úkimetteriniń mańyzdy mindeti – qol jetkizilgen ýaǵdalastyqtardy joǵary deńgeıde tolyqqandy iske asyryp, ekijaqty saýda kólemin 30 mlrd dollarǵa deıin ulǵaıtý. Qazaqstan óńirler arasyndaǵy jáne shekara mańyndaǵy ózara is-qımyldy damytýǵa erekshe kóńil bóledi. Ýfadaǵy óńiraralyq XX mereıtoılyq yntymaqtastyq forýmynyń qorytyndylaryn oń baǵalap otyrmyz. Kelesi forýmdy bıyl Qazaqstanda, Oral qalasynda ótkizý josparlanǵan, - dedi Premer-mınıstr.

Sondaı-aq, ol óńiraralyq yntymaqtastyq forýmdar eki el aımaqtarynyń damýyna serpin qosyp jatqanyn atap ótti.

- Bul format jyldan jylǵa óziniń tıimdiligin dáleldep keledi jáne eki el óńirleriniń arasynda syndarly dıalog qurýda baılanystyrýshy tetik bolyp otyr. Bul jyl túrli deńgeıdegi birlesken is-sharalar men ózara baılanystar turǵysynan mańyzdy oqıǵalarǵa toly jyl bolatynyna senimdimin.

Reseı Qazaqstannyń basty saýda seriktesteriniń biri bolyp esepteledi. 2023 jyly ózara taýar aınalymymyzdyń kólemi ósip, 27,1 mln dollar bolǵan. Ótken jyldyń 11 aıynda da ózara saýda jaqsy nátıje kórsetip, 24,2 mlrd dollardyń mejesine jetti, - dedi Oljas Bektenov.

Osyǵan deıin «Irıkla» sý qoımasyn qadaǵalaý boıynsha Qazaqstan-Reseı birlesken jumys toby qurylǵany týraly jazdyq.