Qazaqstan men Reseı arasyndaǵy yntymaqtastyq: Úkimetaralyq komıssııanyń XXVI otyrysy ótti
ASTANA. KAZINFORM – Astanada Qazaqstan men Reseı Federatsııasy arasyndaǵy yntymaqtastyq jónindegi Úkimetaralyq komıssııanyń XXVI otyrysy ótti. Qazaqstandyq delegatsııany Premer-mınıstrdiń orynbasary – Ulttyq ekonomıka mınıstri Serik Jumanǵarın, reseılik delegatsııany Úkimet tóraǵasynyń orynbasary Alekseı Overchýk basqardy. Bul týraly Úkimettiń baspasóz qyzmeti habarlady.
Otyrys barysynda taraptar kólikke qatysty ózara is-qımyl máselesin keńinen talqylady. Atap aıtqanda, qyrkúıekte Dostyq – Moıynty ýchaskesinde ekinshi joldardyń iske qosylýyna jáne Qytaı – Eýropa – Qytaı baǵyty tranzıtindegi jospardaǵy ósýge baılanysty temirjol tasymaly kólemin ulǵaıtý perspektıvasy qaraldy.
Qazaqstan-Reseı ótkizý pýnkti arqyly ótetin júkterdiń perspektıvalyq kólemin birlesip baǵalaý týraly, sondaı-aq ekijaqty jáne tranzıttik qatynastaǵy júk aǵynyn ulǵaıtý úshin «Soltústik-Ońtústik» halyqaralyq kólik dálizin damytýǵa odan ári járdemdesý týraly ýaǵdalastyqqa qol jetkizildi.
Qazaqstandyq tarap sondaı-aq 2025 jylǵy 1 qańtardan bastap kúshine engen Reseıdiń kóshi-qon zańnamasyndaǵy ózgeristerge baılanysty qazaqstandyq avtotasymaldaýshylardyń problemalary týraly máseleni kóterdi. Jańa normalarǵa sáıkes, sheteldik azamattardyń Reseıde tirkeýsiz bolý merzimi bir jyl ishinde 180-den 90 kúnge deıin qysqardy. Reseı tarapy halyqaralyq tasymaldy júzege asyratyn qazaqstandyq júrgizýshilerdiń burynǵy bolý merzimin 180 kúnge deıin qaıtarý jónindegi máseleni tez arada sheshýge járdemdesýge daıyn ekenin bildirdi.
Agroónerkásiptik keshen máselesine erekshe nazar aýdaryldy. Taraptar joǵary ónimdiligi, syrtqy faktorǵa tózimdiligi jáne jaqsartylǵan sapalyq sıpattamalary bar aýyl sharýashylyǵy daqylynyń básekege qabiletti jańa sorttaryn qurý jónindegi birlesken jumysty talqylady.
Aýyl sharýashylyǵy ónimderimen, azyq-túlikpen ózara saýda kólemin keńeıtý týraly ýaǵdalastyqqa qol jetkizildi.
Reseı tarapy Qazaqstannan zyǵyr men jasymyq tuqymyn ákelýge fıtosanıtarlyq shekteýdi alyp tastaý máselesin qarastyrýǵa, sondaı-aq Reseı aýmaǵynda jınaqtalǵan astyq pen burshaq daqylynyń tranzıtin qamtamasyz etýge daıyn ekenin bildirdi.
Otyrys barysynda otyn-energetıka kesheni, qarjy, munaı jáne gaz, ónerkásip, atom energetıkasy, standarttaý jáne metrologııa, týrızm, bilim berý, baılanys jáne aqparattyq tehnologııa salasyndaǵy ózekti yntymaqtastyq máselesi talqylandy.
Otyrys qorytyndysy boıynsha delegatsııa basshylary Úkimetaralyq komıssııanyń XXVI otyrysynyń hattamasyna qol qoıdy. Komıssııanyń kelesi otyrysy 2026 jyly Ombyda (Reseı Federatsııasy) ótkizilmek.
Aıta keteıik, Astanada Eýrazııalyq turaqtandyrý jáne damý qorynyń shtab-páteri ashyldy.