Qazaqstan men Reseı arasyndaǵy birtutas energetıkalyq júıege qatysty zań qabyldandy

ASTANA. KAZINFORM — Májilistiń jalpy otyrysynda «Qazaqstan Úkimeti men Reseı Úkimeti arasyndaǵy QR men RF-nyń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkatsııalaý týraly» QR Zańy qabyldandy.

— Qazaqstan men Reseıdiń energetıkalyq júıeleri ózara qatar jumys jasaıdy. Kelisimniń maqsaty — taraptardyń ózara qarym-qatynasyn rásimdeý jáne negizgi sharttardy aıqyndaý. Sońǵy jyldary elimizde elektr qýatynyń tapshylyǵy baıqalady, osyǵan baılanysty Qazaqstan men Reseı energo júıeleriniń shekarasynda aýytqýlar ulǵaıa tústi, ıaǵnı kelisilgen memleketaralyq saldosy +/- 150 MVt kóleminen edáýir asyp tústi. Keıde elektr qýatynyń aýytqýy 1500 MVt-qa deıin jetti. Osyǵan oraı Reseı tarapy 2021 jylǵy 15 qarashada eki eldiń Úkimeti arasyndaǵy 2009 jylǵy 20 qarashadaǵy birińǵaı energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ózektendirý máselesi kóterildi, — dedi Energetıka mınıstri Almasadam Sátqalıev Májilistiń jalpy otyrysynda.

Osy oraıda mınıstr Qazaqstan men Reseıdiń arasyndaǵy birtutas energetıkalyq júıe týraly kelisimge ózgerister men tolyqtyrýlar engizýdi usynyp otyr. 

— Eki eldiń energetıka mınıstrlikteri men múddeli organdardyń qatysýymen talqylaýlar men kelissózder sheńberinde jáne birlesken jumys toby aıasynda Qazaqstan men Reseı energojúıesiniń qatar jumys isteýine baılanysty máselelerdi retteý jónindegi is-sharalar jospary qabyldandy. Eki el mamandarynyń kelissózderi barysynda kelisimge ózgerister men tolyqtyrýlar engizý jónindegi hattama jobasynyń barlyq daýly máseleleri boıynsha konsensýsqa qol jetkizildi, — deıdi ol.

Sondaı-aq energetıka mınıstri ekijaqty kelisimge tıisti túzetýler ázirlengenin aıtty. 

— Atap aıtqanda Reseı tarapynyń talaptaryn barynsha azaıtý jáne Qazaqstan Respýblıkasynyń ulttyq múddesin qorǵaý qamtamasyz etildi. Onyń ishinde «Atameken» ulttyq kásipkerler palatasy men akkredıttelgen uıymdardyń oń saraptamalyq qorytyndylary alyndy. Onyń qorytyndysy boıynsha 2023 jylǵy 9 qarashada eki eldiń energetıka mınıstrlikteri arasynda kelisimge qol qoıyldy, — dep tolyqtyrdy A. Sátqalıev.

Ótken jyly Qazaqstan elektr energııasynyń tapshylyǵyn jabýǵa jyl saıyn qansha qarajat jumsaıtynyna sholý jasaǵan edi.