Qazaqstan men Reseı arasynda sheshimin tappaǵan másele joq: saıasattanýshy Prezıdenttiń Reseıge sapary týraly
ASTANA. KAZINFORM – Qazaqstandyq saıasattanýshy, halyqaralyq qatynastar boıynsha sarapshy Rızzat Tasym Prezıdent Qasym-Jomart Toqaevtyń Reseı Federatsııasyna jaqynda bolǵan memlekettik saparynyń mańyzy men mánin qarapaıym tilmen túsindirip berdi.
- Iá, shynymen de álem nazaryn, ásirese Reseı qaýymyn qyzyqtyrǵan memlekettik sapardyń biri boldy. Onyń jandanýyna sebep bolǵan AQSh-tan keıin bolǵan sapardyń bolýy da, nazardy qyzyqtyra tústi. Búginde Qazaqstannyń 8 oblysy Reseıdiń 11 aımaǵymen shektesedi. Beıbitshilik shekarasynyń bolýy, Qazaqstan-Reseı qarym-qatynasynyń mańyzdy ekenin kórsetken sekildi. Prezıdent memlekettik sapar aldynda Qazaqstan-Reseı qarym-qatynasy týraly maqala jarııalady. Reseı tarapy buǵan deıin emotsııaǵa berilip nemese keıbir depýtattar tarapynan Dýma deńgeıinde orynsyz aıyptaýlar, túsinispeýshilikter aıtylǵan bolatyn. Osy rette olardyń da kózi jetken sekildi, eń birinshi Qazaqstan Reseıge múddeli emes, Reseıdiń Qazaqstanǵa múddeli ekenine. Sonyń arqasynda aıtylǵan sózder, kelisilgen kelisimsharttar jańa mánge ıe bola bastady, qosymsha kúsh paıda boldy, - dedi Rızzat Tasym Kazinform agenttiginiń «BIZDIÑ ORTA» podkastynda.
Saıahattanýshy aıtyp ótkendeı, eki el ózara baılanysty nyǵaıtyp otyr.
- Prezıdenttiń ózi aıtqandaı, Qazaqstan men Reseı arasynda sheshimin tappaǵan máseleler joq. Bolsa, syndarly dıalogtyń arqasynda kelisimge kelip otyrmyz dedi, rasymen de solaı, - deıdi ol.
Onyń aıtýynsha, endigi mindet syndarly dıalogty joǵaltyp almaý.
- Álemdegi eń úlken shekara, ol beıbitshilik shekarasy bolý kerek. Reseımen shekaraǵa qatysty basty máseleler 90 jyldardyń basynda sheshilip tastaldy. Sondyqtan da ishki qaýymdy mazalaıtyn basty máseleler aldyn ala sheshilip qoıylǵan, - degen saıası oıyn ortaǵa saldy Rızzat Tasym áńgime barysynda.
Osyǵan deıin sarapshy Qazaqstan 30 jyl ishinde orta derjava deńgeıine kóterilgenin aıtty.