Qazaqstan men Reseı arasynda eshqandaı kúrdeli problema joq – Memleket basshysy

ASTANA. KAZINFORM – Memleket basshysy Qasym-Jomart Toqaev Reseı Federatsııasynyń Prezıdenti Vladımır Pýtınmen keńeıtilgen quramdaǵy kelissózde eki eldiń úkimetterine birqatar tapsyrmalar berilgenin málim etti.

«Memlekettik saparmen kelý barý týraly sheshim qabyldaǵanyńyz úshin taǵy da rızashylyǵymdy bildiremin. Buǵan deıin aıtqanymdaı, bul sapar bizdiń strategııalyq áriptestigimizdi keńeıtip, tereńdetý turǵysynan óte mańyzdy. Jańa ǵana shaǵyn quramdaǵy kelissózde biz kún tártibindegi máselelerdi iskerlik ahýalda, óte tyńǵylyqty talqyladyq», - dedi Prezıdent.

Memleket basshysy eki el yntymaqtastyǵynyń kún tártibi keń aýqymdy ekenin atap ótti.

«Ortaq mámlege kelip, Úkimetke tıisti tapsyrmalar berdik dep oılaımyn. Aldymyzda óte úlken jumys kútip tur. Men prezıdent retinde, bul jumystyń bárin baqylaýda ustaımyn. Óıtkeni biz Reseı Federatsııasymen yntymaqtastyqty damytýǵa basymdyq beremiz.

Bizdiń memleketterimizdiń arasynda eshqandaı kúrdeli problema joq. Basqa máselelerde de sondaı. Yntymaqtastyq tyǵyz damyp jatqandyqtan árıne, memleket basshylary men úkimet basshylarynyń nazaryn qajet etetin máseleler týyndap jatady.

Ol úshin barlyq máselelerdi sheshýge baǵyttalǵan osyndaı is-sharalar iske asyrylady», - dedi Qasym-Jomart Toqaev.