Qazaqstan men Reseı arasynda 99 myńnan astam jolaýshy qatynady
ASTANA. KAZINFORM – Bıyl Qazaqstan men Reseı arasyndaǵy temirjol baǵyttarymen 99 myńnan astam jolaýshy saparǵa shyqty. 2025 jyldyń qorytyndysy boıynsha bul baǵyttaǵy jalpy jolaýshylar aǵyny shamamen 300 myń adamǵa jetken.
Búginde eki el arasynda iri qalalardy baılanystyratyn 8 halyqaralyq jolaýshylar baǵyty qatynaıdy.
Qoldanystaǵy baǵyttar:
1. №7/8 «Almaty-2 — Saratov» — kún ara
2. №83/84 «Qaraǵandy — Máskeý» — aptasyna 2 ret
3. №113/114 «Almaty-2 — Qazan» — aptasyna 1 ret
4. №145/146 «Nurly jol — Omby» — aptasyna 3 ret
5. №301/302 «Almaty-2 — Novosibir» — kún ara
6. №325/326 «Atyraý — Astrahan» — kún ara
7. «Almaty — Máskeý» qatynasyndaǵy tirkemeli vagondar — kún ara
8. №407/408 «Lokot — Rıdder» — Reseı tarapynan qalyptastyrylatyn poıyz belgili kúnder boıynsha qatynaıdy.
Jolaýshylar arasynda Astana — Omby, Almaty — Novosibir, Almaty — Qazan jáne Qaraǵandy — Máskeý baǵyttaryna suranys joǵary. Birqatar halyqaralyq baǵytta otandyq RWS Wagon zaýytynda shyǵarylǵan jańa vagondar paıdalanýǵa berildi. Bul jolaýshylarǵa jaıly jaǵdaı jasaýǵa, qyzmet kórsetý sapasyn arttyrýǵa jáne alys baǵyttardaǵy sapardy qolaıly etýge múmkindik berdi.
Jańa jolaýshylar vagondary kondıtsıoner júıelerimen, bıodárethanalarmen, zamanaýı jatyn oryndarmen, USB qosqyshtarymen, jaqsartylǵan dybys oqshaýlaý júıesimen, beınebaqylaý kameralarymen, sondaı-aq, erekshe qajettiligi bar jolaýshylarǵa arnalǵan kýpelermen jabdyqtalǵan.
Sonymen qatar 2025 jyldyń qorytyndysy boıynsha Qazaqstan men Reseı Federatsııasy arasyndaǵy temirjoldyq ózara is-qımyl oń qarqyn kórsetti. Tasymaldyń jalpy kólemi 92,1 mln tonna bolsa, bul 2024 jylǵy deńgeıden 3,5% joǵary.
Kórsetkishterdiń ósýine tranzıttik operatsııalar negizgi úles qosty. Onda reseılik júkterdiń Qazaqstan aýmaǵy arqyly eksporty 16,1% ulǵaıyp, 17,3 mln tonnaǵa jetti. Al qazaqstandyq júkterdiń Reseı arqyly tranzıtpen eksporty 20,4% ósip, 21,5 mln tonna boldy. Júk aǵyndaryn damytýdyń negizgi faktory 2025 jyly qarashada Máskeýde qol qoıylǵan Temirjol kóligimen tranzıttik tasymaldaý týraly úkimetaralyq kelisim boldy. Ol qazirdiń ózinde praktıkalyq nátıje kórsetip, yntymaqtastyqty odan ári keńeıtý úshin jaǵdaı jasaıdy.
«QTJ» UK» AQ baspasóz qyzmeti málimetinshe, qabyldanǵan sharalardyń tıimdiligin 2026 jyldyń 4 aıynyń nátıjesi rastaıdy: qazaqstandyq júkterdiń eksporty (kómir, qarmet, tyńaıtqyshtar) Reseı Federatsııasy arqyly tranzıtpen 70 myń tonnaǵa artyp, 7 mln tonnaǵa jetti. Al reseılik júkter (munaı ónimderi, qarmet, astyq, azyq-túlik) Qazaqstanǵa/arqyly kólemi 20 % ósimmen shamamen 12 mln tonnadan asty.
Qazaqstan men Reseı arasyndaǵy taýar aınalymy 16% artqanyn jazǵan bolatynbyz.
