Qazaqstan men Reseı arasynda 170-ten astam joba iske asyrylyp jatyr
ASTANA. KAZINFORM – Májilis delegatsııasy Máskeýde Qazaqstan Respýblıkasy Parlamenti Májilisi men Reseı Federatsııasy Federaldyq Jınalysynyń Memlekettik Dýmasy arasyndaǵy Yntymaqtastyq jónindegi palataaralyq parlamenttik komıssııanyń XII otyrysyna qatysty.
Májilistiń vıtse-spıkeri Albert Raý men Memlekettik Dýma tóraǵasynyń orynbasary Aleksandr Jýkovtyń tóraǵalyǵymen ótken Palataaralyq komıssııanyń otyrysy joǵary deńgeıdegi kelissózderdiń qorytyndysyn talqylaýdan bastaldy.
– Reseı – bizdiń senimdi odaqtasymyz, strategııalyq áriptesimiz jáne tatý kórshimiz. Qazaqstan Prezıdenti Qasym-Jomart Toqaevtyń jýyrda Reseıge jasaǵan memlekettik sapary eki el arasyndaǵy baılanys joǵary deńgeıdegi ózara senim men qurmetke negizdelgenin kórsetti. Osy jaǵdaıda úkimetter, aımaqtar jáne biz – depýtattar memleket basshylary deńgeıinde qol jetkizilgen kelisimderdi júzege asyrý boıynsha jumysty jalǵastyrýymyz qajet. Sonyń ishinde bul kelisimderge ýaqytyly zańnamalyq qoldaý kórsetý mańyzdy, – dedi Albert Raý.
Májilis vıtse-spıkeri parlamentter arasyndaǵy ózara is-árekettiń Qazaqstan men Reseı arasyndaǵy odaqtyq qatynastardyń mańyzdy baǵyttarynyń biri ári ajyramas bóligi ekenin erekshe atap ótti. Depýtattar arasyndaǵy kezdesýlerdiń júıeli sıpaty men joǵary deńgeıdegi dıalog eki el arasyndaǵy eń ózekti máselelerdi jedel sheshýge múmkindik beredi.
Albert Raý ekijaqty taýar aınalymynyń jyl saıyn turaqty túrde ósýi ony jaqyn arada 30 mıllıard dollarǵa jetkizý maqsatyn tolyq iske asyrýǵa múmkindik beretinine nazar aýdardy. Sol úshin eki el úkimetteri arasynda 2026-2030 jyldarǵa arnalǵan Keshendi ekonomıkalyq yntymaqtastyq baǵdarlamasy ázirlengen. Óz kezeginde depýtattar josparlanǵan barlyq is-sharany ýaqytyly ári tolyqqandy oryndalýyn qadaǵalaýǵa tıis.
Májilis vıtse-spıkeri atap ótkendeı, Qazaqstan men Reseı arasyndaǵy ónerkásiptik kooperatsııa aıasynda ónerkásip jáne aýyl sharýashylyǵy salalarynda jańa óndiristik tizbekter men jumys oryndaryn quratyn keń aýqymdy birlesken jobalar paketi qalyptasqan. Barlyǵy 65 myńǵa jýyq jumys orny ashylatyn, 50 mlrd dollardan asatyn 170-ten astam joba iske asyrylyp jatyr. Bul – eki el arasyndaǵy uzaq merzimdi, ózara tıimdi seriktestiktiń naqty kórsetkishi. Qazaqstan men Reseı ekonomıkasynyń áleýeti ózara yntymaqtastyqty arttyratyn rezervterge ıe, ol jańa bastamalar úshin únemi ózara is-árekettiń jańa baǵyttaryn izdeýdi qajet etedi.
Otyrys barysynda depýtattar logıstıka, energetıka, aýyl sharýashylyǵy, tsıfrlandyrý jáne mádenı-gýmanıtarlyq yntymaqtastyq salasyndaǵy ózekti máselelerdi jan-jaqty talqylady.
Bul oraıda depýtat Bolatbek Najmetdınuly kólik-logıstıka salasyndaǵy birlesken jumys perspektıvalaryna, sonyń ishinde «Soltústik-Ońtústik» halyqaralyq kólik dálizin damytý jónindegi jol kartasyn iske asyrýǵa erekshe toqtaldy.
– Reseı – Qazaqstan – Túrikmenstan – Iran – Bandar-Abbas porttary men Parsy shyǵanaǵy arasynda tolyqqandy qurlyq baılanysyn iske qosýdyń biz úshin strategııalyq mańyzy bar. Beıneýden Túrikmenstanǵa deıingi baǵyt qazir jumys istep tur. Al biz Reseıdiń osy temirjol dálizine qosylýyn kútemiz. Bul joba Taıaý Shyǵysqa, Úndistanǵa jáne Afrıkaǵa deıingi logıstıkalyq joldy qysqartýǵa jol ashyp, Eýrazııanyń negizgi qurlyq jolyna aınalýy múmkin, – dedi depýtat baıandamasynda.
Reseı tarapynan jańa standarttar men tehnıkalyq talaptardy engizý máselesin aıtqan Májilis depýtaty jańa normalardyń EAEO aıasyndaǵy ózara saýda protsesine qosymsha kedergiler týǵyzbaýdyń mańyzyn atap ótti. Qazaqstan parlamentshileriniń ustanymy – Eýrazııa keńistiginde erkin ónim aınalysyn saqtaý úshin barlyq tarapqa tıimdi barynsha qolaıly jaǵdaı jasaý.
Májilistiń Agrarlyq máseleler komıtetiniń tóraǵasy Serik Egizbaev astyqty tereń óńdeý boıynsha birlesken jobalar qurý jáne aýyl sharýashylyǵy tehnıkalaryn óndirý salasyndaǵy yntymaqtastyqty keńeıtý máselesin kóterdi. Ol ásirese, veterınarlyq jáne fıtosanıtarlyq baqylaý salasyndaǵy aqparattyq júıelerdi ıntegratsııalaýdyń mańyzdylyǵyna erekshe nazar aýdaryp, bul úshinshi elderge jáne keri baǵytta aýyl sharýashylyǵy janýarlary, ósimdik sharýashylyǵy jáne mal sharýashylyǵy ónimderiniń tranzıtin keńeıtýge múmkindik beretinin aıtty. Sonymen qatar depýtat Qazaqstannan Reseıge aýyl sharýashylyǵy ónimderin ımporttaýǵa qoıylǵan ýaqytsha shekteýlerdi alyp tastaý máselesin qarastyrýdy usyndy.
Depýtat Ashat Raqymjanov óz sózinde mıgratsııalyq saıasat máseleleri boıynsha 1 jylda Reseı aýmaǵynda 90 kúntizbelik ýaqyttan artyq júrýge bolmaıdy degen talapty keı sanattaǵy adamdar úshin jeńildetý týraly usynys bildirdi. Bul sanatqa stýdentter, medıtsınalyq mekemelerdiń patsıentteri, avtokólik tasymaldaýshylar, jolaýshylar poıyzdarynyń jolserikteri jáne elde qyzmettik, óndiristik nemese basqa da qajettilikpen zańdy túrde júrgen adamdar jatady.
Taraptar Qazaqstannyń soltústik jáne shyǵys óńirlerin gazdandyrý máselelerin, atom energetıkasyn damytý salasyndaǵy yntymaqtastyqty jáne zańnamany jetildirýge qatysty sheshimder izdeýdi talqylady. Jasandy ıntellektini damytýǵa arnalǵan retteý sharalaryna, JI qoldanýdaǵy etıkalyq tásilderge, kıberqaýipsizdikke jáne azamattardy alaıaqtyq áreketterden qorǵaýǵa erekshe nazar aýdaryldy.
Otyrysta sondaı-aq reseılik joǵary oqý oryndary fılıaldarynyń qyzmetin retteý jáne týrızmdi damytý máseleleri qaraldy.
Talqylaý qorytyndysy boıynsha Parlamentaralyq keńestiń teń tóraǵalary Albert Raý men Aleksandr Jýkov talqylaý barysynda qol jetkizilgen kelisimder naqty nátıjelerge jol ashyp, Qazaqstan men Reseı arasyndaǵy qatynastardyń barlyq salasyndaǵy yntymaqtastyqty odan ári damytýǵa qosymsha serpin beretinine senim bildirdi.