Qazaqstan men Reseı 2030 jyldan keıingi ornyqty damý kún tártibin talqylady
ASTANA. KAZINFORM- QR Premer-mınıstriniń orynbasary – ulttyq ekonomıka mınıstri Serik Jumanǵarın men Reseı Federatsııasy Prezıdentiniń ornyqty damý maqsattaryna qol jetkizý úshin halyqaralyq uıymdarmen baılanys jónindegi arnaýly ókili Borıs Tıtov BUU-nyń Ornyqty damý maqsattaryn (ODM) iske asyrý jáne halyqaralyq ári óńirlik alańdardaǵy ózara is-qımyl máselelerin talqylady.
QR Ulttyq eknomıka mınıstrligi baspasóz qyzmetiniń habarlaýynsha, kezdesý qorytyndysynda taraptar osy baǵyttaǵy dıalogty jalǵastyrýǵa múddeli ekenin rastady.
Kezdesý barysynda taraptar ODM-ǵa qol jetkizý máseleleri boıynsha pikir almasyp, ózara tájirıbelerimen bólisti. Sondaı-aq 2030 jyldan keıingi kezeńge arnalǵan halyqaralyq kún tártibiniń ózekti baǵyttaryn qarastyrdy.
Serik Jumanǵarın Ornyqty damý maqsattary Qazaqstannyń memlekettik josparlaý júıesinde tolyq qamtylǵanyn atap ótti. Olardyń ındıkatorlary Ulttyq damý josparynda, sondaı-aq ortalyq memlekettik organdar men óńirlerdiń damý josparlarynda kórinis tapqan. Bul jahandyq maqsattardy eldiń ulttyq basymdyqtarymen ushtastyrýǵa múmkindik beredi.
Kezdesý qorytyndysy boıynsha taraptar ODM-ny iske asyrý jónindegi dıalogty odan ári jalǵastyrýǵa múddeli ekenin rastady.
Aıta keteıik, Qazaqstan 20 jylda Reseıden 30 mlrd dollarǵa jýyq ınvestıtsııa tartty.