Qazaqstan men Portýgalııa saýda-ekonomıkalyq salada yntymaqtastyqty keńeıtpek
ASTANA. KAZINFORM — QR Syrtqy ister mınıstriniń orynbasary Arman Isetov Portýgalııa Respýblıkasynyń jańadan taǵaıyndalǵan elshisi Joze Ataıde Amaraldan senim gramotalarynyń kóshirmelerin qabyldady, dep habarlaıdy vedomstvonyń baspasóz qyzmeti.
Kezdesý barysynda A.Isetov portýgalııalyq dıplomatty jyly qabyldap, onyń taǵaıyndalýy Qazaqstan men Portýgalııa arasyndaǵy yntymaqtastyqtyń jańa kezeńin ashatynyna senim bildirdi.
— Dıplomattar saıası, saýda-ekonomıkalyq jáne mádenı-gýmanıtarlyq salalardaǵy ekijaqty ózara is-qımyldyń qazirgi ahýaly men perspektıvalaryn jan-jaqty talqylap, sharttyq-quqyqtyq bazany keńeıtýdiń mańyzdylyǵyna nazar aýdardy. Bul elder arasyndaǵy ózara tıimdi baılanystardy edáýir jandandyrýǵa múmkindik beredi, — delingen habarlamada.
Kezdesý qorytyndysy boıynsha taraptar qazaq-portýgal yntymaqtastyǵyn odan ári damytý baǵytyndaǵy jumysty jandandyrýǵa ózara daıyndyqtaryn rastady.
Budan buryn Portýgalııa azamattyǵyn alý úshin myńdaǵan ızraıldik kezekke turǵanyn jazǵan edik.