Qazaqstan men Portýgalııa Devıs kýbogyna qatysatyn quramdaryn jarııalady
ASTANA. QazAqparat - Qazaqstan men Portýgalııa Devıs kýbogyna qatysatyn erler komandasynyń quramyn jarııalady, dep habarlaıdy QazAqparat «SPORTINFORM» SAA-ǵa silteme jasap.
Eske sala keteıik, BNP Paribas Devıs kýbogynyń Qazaqstan men Portýgalııa arasyndaǵy matchy 1-2 aqpan kúnderi Astana qalasyndaǵy «Dáýlet» ulttyq tennıs ortalyǵynda ótedi. Kezdesý jeńimpazy 18-24 qarasha kúnderi Madrıdte ótetin týrnırdiń fınaldyq kezeńine joldama alady.
Qazaqstan quramasynyń kapıtany Dıas Dosqaraev komandanyń quramyn: Mıhaıl Kýkýshkın (ATR reıtınginde 56-oryn), Aleksandr Nedovesov (193), Aleksandr Býblık (164), Tımýr Habıbýlın (ATR juptyq jarysynda - 162) jáne Denıs Evseevterden (322) jasaqtady.
Osy jigitterge qarsy Joaý Soýza (ATR reıtınginde - 44), Pedro Soýza (103), Joaý Domıngesh (224) jáne Gashtan Elıash (245) kortqa shyǵady. Portýgalııa quramasynyń kapıtany - Rýı Machado.
Qazaqstannyń erler komandasy buǵan deıin de halyqaralyq iri tennıs týrnırlerinde joǵary nátıjelerge qol jetkizgen. Al Devıs kýbogynyń Álemdik kezeńiniń shırek fınalynda bes ret óner kórsetken.
Qazaqstan-Portýgalııa matchtarynyń kestesi:
1 aqpan, 14:00-de bastalady.
13:45 - týrnırdiń ashylý rásimi
14:00 - matchtar (2 dara kezdesý)
2 aqpan, 12:00-de bastalady
11:50 - ashylý saltanaty
12:00 - matchtar (1 juptyq kezdesý, 2 dara kezdesý)
