Qazaqstan men Polsha agrarlyq saýda salasynda yntymaqtastyqty kúsheıtedi
ASTANA. KAZINFORM — Aýyl sharýashylyǵy vıtse-mınıstri Amanǵalı Berdalın Polsha Respýblıkasynyń Aýyl sharýashylyǵy jáne aýyldyq aýmaqtardy damytý mınıstrliginiń Memlekettik hatshysy ıAtsek Chernıakpen kezdesti, dep habarlaıdy QR AShM baspasóz qyzmeti.
Polıak delegatsııasynyń quramyna Polshanyń Bas veterınarııalyq dárigeri Pavel Meıer, Ulttyq aýyl sharýashylyǵyn qoldaý ortalyǵynyń bas dırektory Henryk ıÝzef Smolaj jáne tıisti vedomstvolardyń basqa da ókilder boldy. Qazaqstan tarapynan kezdesýge QR AShM Veterınarııalyq baqylaý jáne qadaǵalaý komıtetiniń qyzmetkerleri qatysty.
Kelissóz barysynda taraptar veterınarııa salasyndaǵy jáne janýarlardan alynatyn ónimderdiń qaýipsizdigin qamtamasyz etý baǵytyndaǵy yqpaldastyq máselelerin talqylady. Ásirese, qazaqstandyq jáne polıak kásiporyndarynda ınspektsııalar júrgizý, óńirlendirý qaǵıdatyn qoldaný, sondaı-aq aýyl sharýashylyǵy ónimderiniń ımporty men tranzıtine qatysty qoldanystaǵy shekteýlerge basa nazar aýdaryldy.
Amanǵalı Berdalın eki el arasyndaǵy áriptestikti nyǵaıtýdyń mańyzdylyǵyn atap ótti.
— Qazaqstan Polsha tarapymen veterınarııalyq baqylaý jáne agrarlyq saýda baǵytynda yntymaqtastyqty kúsheıtýge múddeli. Biz syndarly dıalogqa, tájirıbe almasýǵa jáne rásimderdiń ashyqtyǵyn arttyrýǵa daıynbyz. Bul janýarlardan alynatyn ónimderdiń joǵary deńgeıdegi qaýipsizdigin birlese qamtamasyz etýge múmkindik beredi, — dedi vıtse-mınıstr.
ıAtsek Chernıak óz kezeginde Polsha ónimderiniń qazaqstandyq naryqqa qoljetimdiligin keńeıtýge kóńil bólip, epızootııalyq ahýal boıynsha ózekti aqparattardy usyný mańyzdylyǵyna toqtaldy.
Kezdesý qorytyndysy boıynsha taraptar ózara is-qımyldy jalǵastyrýǵa, aqparat almasýdy kúsheıtýge jáne veterınarııa men janýarlardan alynatyn ónimderdiń qaýipsizdigi salasynda eki memlekettiń quzyretti organdary arasyndaǵy yntymaqtastyqty nyǵaıtýǵa daıyn ekenderin jetkizdi.
Osydan buryn Memleket basshysy aýyl sharýashylyǵy ónimderin syrtqy naryqqa úzdiksiz jetkizý úshin áýe tasymaldaý áleýetin belsendi qoldanýdy tapsyrǵan edi.