Qazaqstan men Polshanyń ózara taýar aınalymy 1 mlrd 100 mln dollarǵa jetti
ASTANA. QazAqparat - Varshavada Memleket basshysy Nursultan Nazarbaevtyń Polsha Respýblıkasynyń Prezıdenti Andjeı Dýdamen kelissózderi qorytyndysy boıynsha birlesken baspasóz máslıhaty ótti.
Bul týraly Aqordanyń baspasóz qyzmeti habarlady.
Baspasóz máslıhaty barysynda Qazaqstan Prezıdenti ótken kelissózderdiń jemisti bolǵanyn aıtyp, bıyl eki eldiń dıplomatııalyq qarym-qatynasynyń ornaǵanyna 25 jyl tolatynyn atap ótti.
- Bizdiń elderimizdi ortaq tarıh baılanystyrady. Polsha - Qazaqstannyń Eýropadaǵy eń jaqyn ári mańyzdy seriktesiniń biri. Elderimizdiń arasynda ásirese ekonomıkalyq sala boıynsha ózara tıimdi kóptegen perspektıvaly baǵyttar bar. Erteń elimizdegi isker toptar ókilderiniń qatysýymen iri bıznes-forým ótedi. Jalpy quny 1 mlrd dollar bolatyn ekijaqty kelisimderge qol qoıý josparlanyp otyr, - dedi Nursultan Nazarbaev.
Memleket basshysy respýblıkamyzda eki el arasyna dáneker bolyp otyrǵan 40 myńǵa jýyq polıak turyp jatqanyn atap ótti.
- Bıyl olardyń Qazaqstanǵa jer aýdarylǵanyna 80 jyl tolady. Bulardyń barlyǵy - elimizde turyp jatqan 130-dan astam ult ókilimen teń quqyly óz azamattarymyz. Memleket olarǵa barynsha qoldaý kórsetip keledi, - dedi Qazaqstan Prezıdenti.
Nursultan Nazarbaev Qazaqstannyń ındýstrııalyq áleýeti artyp otyrǵanyna nazar aýdardy.
- 5 jyl ishinde myńǵa jýyq jańa óndiris kásiporny iske qosyldy. Polsha bıznesmenderin osy jumysqa atsalysýǵa shaqyramyn. Bul úshin barlyq jaǵdaı jasalǵan. Máselen, kelesi jyldan bastap eki eldiń azamattary úshin vızasyz rejim engizý josparlanýda, tikeleı áýe baılanysyn jolǵa qoıý múmkindigi qarastyrylyp otyr. Búginde ózara taýar aınalymy 1 mlrd 100 mln dollarǵa jetti. Árıne, bul qazirgi áleýetimizdi tolyq kórsete almaıdy, - dedi Memleket basshysy.
Qazaqstan Prezıdenti elderimizdiń túrli baǵyt boıynsha ekijaqty yntymaqtastyǵyn nyǵaıtýǵa múmkindigi bar ekenin aıtty.
- Aramyzdaǵy ózara ekonomıkalyq is-qımyldy jandandyrý jáne azamattarymyzǵa jańa jumys oryndaryn ashý úshin jaǵdaı jasaý qajet. Elderimiz arasyndaǵy senimdi dostyq qarym-qatynas halyqtardyń jaqyndasa túsýine septigin tıgizetinine senemin,- dedi Nursultan Nazarbaev.
Sońynda Memleket basshysy Polsha Prezıdentin «EKSPO-2017» halyqaralyq kórmesine shaqyryp, polıak isker toptary ókilderine Astanadaǵy halyqaralyq qarjy ortalyǵynyń qyzmetine atsalysý jóninde usynys jasady.
