Qazaqstan men Polsha kólik salasyndaǵy yntymaqtastyq máselelerin talqylady
ASTANA. QazAqparat - Astanada Ekonomıkalyq yntymaqtastyq jónindegi úkimetaralyq komıssııa aıasynda kólik salasyndaǵy yntymaqtastyq jónindegi Qazaqstan-Polsha jumys tobynyń II otyrysy boldy, dep habarlaıdy QR IDM baspasóz qyzmeti.
Konteınerlik tasymaldardy damytý salasynda Dostyq/Altynkól-Brest-Dostyq/Altynkól ýchaskesinde konteınerlik poıyzdardy qabyldaý-ótkizý boıynsha birlesken tehnologııany ázirleý máselesi kelisildi. Sonymen qatar, konteınerlik poıyzdardy tehnologııalyq óńdeý ýaqytyn qysqartý múmkindigi qarastyrylady.
Budan bólek, taraptar halyqaralyq Transkaspıılik kólik baǵytyndaǵy (THKB) tasymaldardy birlesip damytýǵa kelisti. Polsha halyqaralyq Transkaspıılik kólik baǵytyn paıdalaný arqyly Qytaıǵa jáne basqa Azııa elderine mys jáne azyq-túlik ónimderin konteınermen tasymaldaýǵa daıyn.
Qatysýshylar avtomobıl kóligi salasyndaǵy yntymaqtastyqty oń baǵalady. 2018 jyly Halyqaralyq avtomobıl tasymaldaryn jasaý úshin ruqsat blankilerimen almasý aldyn-ala kvotasy 2017 jyldyń deńgeıinde belgilendi. Olar mynadaı mólsherde bólinedi: qazaqstandyqtar úshin 10,5 myń ámbebap ruqsattamalar, úshinshi elderge jáne osyndaı elderden 3,5 myń ruqsattama; polshalyqtarǵa 10 myń ámbebap ruqsattama, úshinshi elderge jáne osyndaı elderden 4 myń ruqsattama.
