Qazaqstan men Polsha bitimgerleriniń Iraktaǵy mıssııasy fotokórmede kórsetildi
ALMATY. QazAqparat - Almatydaǵy ortalyq memlekettik mýzeıde «Irak aspanynyń astynda: Qazaqstan jáne Polsha bitimgerleri» fotokórmesi ashyldy, dep habarlaıdy QazAqparat tilshisi.
Kórme «QazBat» batalonynyń Iraktaǵy bitimgerlik mıssııasynyń aıaqtalýyna 10 jyl tolýyna oraı uıymdastyryldy. Kelýshiler nazaryna 30-dan asa fotosýret usynyldy. Fotoqujattarda qazaqstandyq jáne polshalyq sarbazdardyń Iraktaǵy beıbitshilik úshin kúresi sýrettelgen.
Aıta ketý kerek, mıssııa kezinde 22 polsha sarbazy men bir qazaqstandyq ofıtser - Qaırat Qudabaev qaıtys bolǵan edi. Qaza bolǵan sarbazdardyń da sýretteri kórmeden oryn tapty. 
2003 jyly Saddam Hýseın bılikten ketken soń halyqaralyq qaýymdastyq Iraktaǵy ahýaldy turaqtandyrýǵa tyrysty. Osy maqsatty júzege asyrý úshin 4 turaqtandyrý aımaǵy ashyldy. Ońtústik-ortalyq aımaqty kópultty Ortalyq-ońtústik aımaǵynyń dıvızııasy baqylaýǵa aldy. Atalǵan dıvızııany Polsha áskerı kontıngenti baqylady.
Bul dıvızııanyń quramyna 23 memlekettiń áskeri kirdi. Onyń ishinde 2500 Polsha sarbazy men «QazBat» bitimger batalony ınjenerlik-saperlik otrıadynyń sarbazdary bar edi. Bitimgerler Irakqa 2003 jyly jiberildi. «QazBat» bitimger batalony 2000 jyly Prezıdent Nazarbaevtyń Jarlyǵymen qurylǵan bolatyn. Qazaqstandyq otrıad quramynda ınjenerlik-saper toby, sýmen qamtý toby jumys jasady. Olar jarylǵysh zattardy izdep taýyp, saqtaýǵa mindetteldi.
Kezinde birge júrip, bastaryn qaýipke birge tikken qos eldiń bitimgerleri Qazaqstandaǵy mýzeıde 10 jylda birinshi ret bas qosty. Sarbazdar, ardager-bitimgerler sol bir qaterli de mańyzdy kúnderdiń estelikterimen bólisti.
Dál osyndaı fotokórme 25 jeltoqsanda Astanada ótedi. Kóshpeli kórme Polshanyń Gdansk qalasyn baryp toqtaıdy.
