Qazaqstan men Polsha azamattary úshin vızalyq rejimdi jeńildetý máselesi talqylandy
ASTANA. QazAqparat - Qazaqstan men Polsha ózara tıimdi saýda-ekonomıkalyq, mádenı-aǵartýshylyq yntymaqtastyqty odan ári nyǵaıtýǵa jáne eki eldiń azamattary arasyndaǵy baılanystardy keńeıtýge nıetti, dep habarlaıdy QR SІM baspasóz qyzmeti.
Bul týraly 27 sáýirde Qazaqstan Respýblıkasynyń Syrtqy ister mınıstriniń orynbasary Roman Vasılenko Polsha memlekettiliginiń qalpyna kelýiniń 100 jyldyǵyna arnalǵan is-sharalarǵa qatysý úshin Almatyǵa kelgen Polsha Respýblıkasynyń Syrtqy ister mınıstriniń orynbasary Andjeı Papejamen kezdesýinde talqylady.
Kezdesý barysynda taraptar ekijaqty baılanystardyń keń aýqymdy máselelerin talqylady jáne eki el arasyndaǵy saıası, ekonomıkalyq jáne mádenı-gýmanıtarlyq yntymaqtastyqtyń joǵary deńgeıine rızashylyǵyn bildirdi. Qazaq-polıak qarym-qatynastaryn damytýǵa qýatty serpindi joǵary deńgeıdegi turaqty saparlar bergeni atap ótildi. Sondyqtan, Qazaqstan Prezıdenti Nursultan Nazarbaevtyń 2017 jyly qyrkúıekte Polshaǵa jasaǵan memlekettik sapary, sondaı-aq Polsha Prezıdenti Andjeı Dýdanyń 2016 jyly tamyz aıynda Qazaqstanǵa jasaǵan memlekettik sapary yntymaqtastyqty nyǵaıtý úshin berik negiz qalaı otyryp, qarym-qatynastardy odan ári damytýǵa eleýli serpin berdi.
Qazaqstan tarapy QR Prezıdentiniń tóraǵalyǵymen 2018 jyly 18 qańtarda BUU Qaýipsizdik Keńesinde ótken «Jappaı qyryp-joıý qarýyn taratpaý: senimdilik sharalary» taqyrybyndaǵy joǵary deńgeıdegi pikirtalasqa Polsha Prezıdentiniń qatysýyna erekshe rızashylyǵyn bildirdi. Bıylǵy mamyr aıynda osy mańyzdy organda tóraǵalyq etetin Polshaǵa sáttilik tilep, R.Vasılenko óz áriptesine aldaǵy tóraǵalyq aıasyndaǵy mańyzdy is-sharalarǵa qazaqstandyq tarapynyń qatysýyn Qazaqstan qamtamasyz etýge daıyn ekendigin aıtty.
Sonymen qatar, kezdesý barysynda búgingi kúnge ártúrli deńgeılerde turaqty baılanystar ornatylǵanyn atap ótildi. Atap aıtqanda, Polshanyń Premer-Mınıstri Mateýsh Marovetskııdiń Astanaǵa osy jyly jasaıtyn sapary jáne onyń Búkilálemdik taý kongresine qatysýy atap ótildi. Sondaı-aq, taraptar 2018 jylǵy 20 maýsymda Astanada ótetin ekonomıkalyq yntymaqtastyq jónindegi Qazaqstan-Polsha úkimetaralyq komıssııasynyń 8-shi otyrysyn talqylady. Aldaǵy kezdesý barysynda jańartylatyn energııa kózderi, ǵylym men tehnıka, agrarlyq sektor jáne týrızmdi damytý salalaryndaǵy yntymaqtastyqty keńeıtý máseleleri talqylanady dep kútilýde.
Jalpy alǵanda, Qazaqstan men Polsha arasyndaǵy dıplomatııalyq qatynastar ornaǵannan beri eki el arasyndaǵy ekonomıkalyq yntymaqtastyq qarqyndy damyp keledi. Búgingi tańda Qazaqstanda 100-den astam polıak kompanııalary jumys isteıdi, olardyń eń irisi POLPHARMA, onyń basshysy QR Prezıdenti janyndaǵy Sheteldik ınvestorlar keńesiniń múshesi bolyp tabylady, sondaı-aq elimizdiń ekonomıkasyna belsendi ınvestıtsııa salatyn SELENA kompanııasy. Qazaqstan men Polsha arasyndaǵy taýar aınalymy 2017 jyly 900 mıllıon dollardan asyp, 2016 jylǵa qaraǵanda 19 paıyzǵa artty.
Kelissózderdegi mańyzdy másele eki memlekettiń azamattary úshin vızalyq rejimdi jeńildetýdi talqylaý boldy. R.Vasılenko polıak tarapyna Qazaqstan men Eýropalyq Odaq arasyndaǵy keńeıtilgen áriptestik jáne yntymaqtastyq týraly kelisim aıasynda kózdelgen Qazaqstannyń azamattary úshin vızalyq rejimdi jeńildetý boıynsha kelissózderdi alǵa jyljytýǵa jan-jaqty qoldaý kórsetkeni úshin alǵysyn bildirdi.
Taraptar, sondaı-aq Qazaqstan men Polsha arasyndaǵy bilim berý salasyndaǵy yntymaqtastyqty damytý máseleleri talqylady. Búgingi tańda Polshada 800-ge jýyq qazaqstandyq stýdentter bilim alatyny belgili. Syrtqy ister vedomstvolarynyń ókilderi bıylǵy jyly eki el arasynda tarıhı jáne mádenı baılanystardy nyǵaıtýǵa baǵyttalǵan birqatar mádenı is-sharalardy ótkizýdi talqylady.
