Qazaqstan men Palestına yntymaqtastyqty nyǵaıtýǵa kelisti
Atap aıtqanda, QR Syrtqy ister mınıstrligi men Palestına Syrtqy ister jáne ekspatrıanttar mınıstrligi arasyndaǵy Saıası konsýltatsııalar jónindegi ózara túsinistik týraly memorandým bekitildi. Bul qujatqa QR SІM basshysy Qaırat Ábdirahmanov jáne Palestına mınıstri Rııad ál-Málkı qol qoıdy.
Sonymen qatar Palestınanyń Saýda, ónerkásip jáne aýyl sharýashylyǵy palatalarynyń federatsııasy men «Qazaqstannyń Syrtqy saýda palatasy» JShS arasyndaǵy yntymaqtastyq týraly memorandýmǵa da qol qoıyldy.
«Búgin biz áriptesimniń Palestına memleketiniń Syrtqy ister jáne ekspatrıanttar mınıstri Rııad ál-Málkıdiń elordamyz - Astanaǵa alǵashqy resmı saparynyń kýási bolyp otyrmyz. Atalǵan sapar eki el arasynda halyqaralyq jáne aımaqtyq ózekti máseleler boıynsha pikir almasýǵa, ekijaqty yntymaqtastyqtyń qazirgi jaǵdaıy men bolashaǵyn aıqyndaýǵa múmkindik berip otyr. Sonymen qatar, qazir ǵana bizdiń syrtqy ister mınıstrlikterimiz arasyndaǵy ekijaqty memorandýmdarǵa qol qoıdyq.Osy rette, atalǵan resmı sapar Qazaqstan men Palestına saıası, saýda-ekonomıkalyq, mádenı-gýmanıtarlyq jáne basqa da salalardaǵy qatynastardy odan ári nyǵaıtýǵa septigin tıgizedi dep úmittenemin. Olardyń ishinen aýyl sharýashylyǵy, medıtsına, bilim salalaryn atap ótýge bolady», - dedi Qaırat Ábdirahmanov.
