Qazaqstan men Pákistannyń Úkimet basshylary saýda-ekonomıkalyq yntymaqtastyqty nyǵaıtý máselelerin talqylady
ASTANA. KAZINFORM - Qazaqstan Respýblıkasynyń Premer-Mınıstri Oljas Bektenov Shanhaı yntymaqtastyq uıymyna múshe memleketter úkimetteri basshylary keńesiniń otyrysyna qatysý úshin Islamabad qalasyna bardy.
Barǵan sátte Pákistan Premer-Mınıstri Shahbaz Sharıfpen kezdesý ótti. Ekijaqty saýda-ekonomıkalyq yntymaqtastyqtyń qazirgi jaǵdaıy men odan ári damý perspektıvalary, sondaı-aq tsıfrlandyrý salasyndaǵy ózara is-qımyl talqylandy.
Oljas Bektenov Memleket basshysy Qasym-Jomart Toqaev Qazaqstan men Pákistan arasyndaǵy ekonomıkalyq kooperatsııa áleýetine erekshe nazar aýdaratynyn atap ótti. Bıylǵy 8 aıdyń qorytyndysy boıynsha ekijaqty taýar aınalymy 16%-ǵa ósip, shamamen $40 mln-dy qurady. Qoldanystaǵy áleýetti ashý úshin taraptar taýar aınalymyn ártaraptandyrýdy jalǵastyrýǵa nıetti. Qazaqstan Pákistan naryǵyna jalpy quny $490 mln-nan asatyn 85 taýar túri boıynsha jetkizý kólemin arttyrýǵa, onyń ishinde jetkiziletin munaı-hımııa, metallýrgııa, hımııa, farmatsevtıka salalarynyń, sondaı-aq tamaq ónerkásibi men mashına jasaý ónimderiniń nomenklatýrasyn keńeıtýge daıyn.
Sonymen qatar aýyl sharýashylyǵy salasyndaǵy yntymaqtastyqqa nazar aýdaryldy. Bıylǵy qańtar-tamyzda qazaqstandyq aýyl sharýashylyǵy ónimderin jetkizý kólemi 2 esege jýyq ósip, $7,7 mln-dy qurady. Qazaqstannan ákelinetin kókónister men dándi daqyldar Pákistan naryǵynda suranysqa ıe. Bıyl kútiletin joǵary ónimdi eskere otyryp, Qazaqstan Úkimeti Pákistanǵa dándi daqyldar jetkizý kólemin jyl saıyn 2 mln tonnaǵa deıin arttyrýǵa daıyn.
Tranzıttik-kólik salasynda temirjol júk tasymaly kóleminiń úsh esege artýy jáne avtomobıl kóligimen tranzıttik tasymaldyń tórt esege ósýi aıasynda úkimetter basshylary qoldanystaǵy «Qazaqstan–Ózbekstan–Aýǵanstan–Pákistan» mýltımodaldy baǵytyn jáne «Qazaqstan–Túrikmenstan–Aýǵanstan–Pákistan» jańa kólik dálizin odan ári damytý perspektıvalaryn talqylady.
Eki el saýda-ekonomıkalyq jáne mádenı-gýmanıtarlyq qatynastardyń barlyq spektri boıynsha ózara is-qımyldy keńeıtýdi jalǵastyrady.
