Qazaqstan men Pákistan taýar aınalymyn 1 mlrd dollarǵa jetkizýge nıetti
ASTANA. KAZINFORM – Ótken jyldyń qorytyndysy boıynsha Qazaqstan men Pákistan arasyndaǵy taýar aınalymy eki esege jýyq ulǵaıyp, 105,6 mln AQSh dollaryna jetti.
Ózara saýdanyń ósýi eki el arasyndaǵy saýda-ekonomıkalyq yntymaqtastyqty odan ári keńeıtý úshin ornyqty alǵysharttardyń bar ekenin rastap otyr.
Orta merzimdi perspektıvada taraptar ekijaqty taýar aınalymy kólemin $1 mlrd-qa deıin jetkizýge nıetti. Bul týraly Saýda jáne ıntegratsııa mınıstri Arman Shaqqalıev Islamabadta ótken Pákistan Islam Respýblıkasynyń Kommertsııa mınıstri Djam Kamal Hanmen ekijaqty kezdesýi barysynda talqylady.
Kelissózder barysynda taraptar ózara saýda kólemin ulǵaıtýǵa baǵyttalǵan jekelegen bastamalardan júıeli jumysqa kóshýge múddeli ekendigin jetkizdi. Arman Shaqqalıev taýar aınalymyn ulǵaıtý boıynsha ekonomıkanyń naqty sektorlaryn aıqyndaýdy, sondaı-aq osy maqsatqa qol jetkizýge baǵyttalǵan is-sharalar men praktıkalyq qadamdardy belgileýdi usyndy.
Atalǵan tetikti iske asyrý eń joǵary saýda-ekonomıkalyq áleýetke ıe basym salalarǵa, sonyń ishinde agroónerkásip kesheni men azyq-túlik ónimderine, hımııa jáne munaı-hımııa ónerkásibine, metallýrgııaǵa, mashına jasaý men farmatsevtıka salasyna basymdyqpen nazar aýdarýdy kózdeıdi.
— Ózara taýar aınalymyn 1 mlrd AQSh dollaryna deıin ulǵaıtý maqsatyna qol jetkizý úshin QazTrade jáne TDAP bastamalardy iske asyrýdyń negizgi operatorlary retinde aıqyndalady. Bul bıznesti súıemeldeý, tikeleı B2B-kontaktilerdi uıymdastyrý jáne birlesken jobalardy júzege asyrý boıynsha júıeli jumysty qamtamasyz etýge múmkindik beredi, — dep atap ótti Arman Shaqqalıev.
Óz kezeginde Pákistan Islam Respýblıkasynyń Saýda mınıstri qazaqstandyq taraptyń bastamasyn qoldady.
— Pákistan Qazaqstanmen saýda qatynastaryn damytýǵa erekshe mán beredi. Qazaqstan Ortalyq Azııadaǵy eń iri ekonomıka ǵana emes, sonymen qatar óńirdegi Pákistannyń eń iri eksporttyq naryǵy, — dedi Djam Kamal Han.
Kezdesý qorytyndysy boıynsha hattamaǵa qol qoıyldy. Onda ortadaǵy kelisimdi iske asyrý boıynsha QazTrade pen TDAP-qa tıisti mindetter júkteldi.
Aıta ketelik Qazaqstan men Pákistan arasyndaǵy yntymaqtastyqtyń negizgi baǵyttary men onyń bolashaq damý múmkindikteri týraly jazǵan edik.