Qazaqstan men Pákistan kólik-logıstıka salasyndaǵy ózara is-qımyldy arttyrýǵa nıetti

ISLAMBAD.  KAZINFORM — Qazaqstannyń Pákistandaǵy Elshisi Erjan Qystafın Pákistannyń Federaldy saýda mınıstri Djam Kamal Han men Pákistan Ekonomıka mınıstriniń orynbasary Hýmaır Karımmen kezdesti. Bul týraly QR Syrtqy ister mınıstrliginiń baspasóz qyzmeti málim etti. 

— Kelissózder barysynda taraptar ártúrli salalarda, eń aldymen saýda salasynda ekijaqty yntymaqtastyqta qalyptasqan oń dınamıkaǵa qanaǵattanýshylyqtaryn bildirdi, — delingen habarlamada.

Pákistanda 2025 jyldyń basyna josparlanǵan Qazaqstan-Pákistan úkimetaralyq komıssııasynyń, birlesken jumys toptarynyń jáne bıznes-forýmnyń aldaǵy otyrystaryna daıyndyq máseleleri egjeı-tegjeıli talqylandy.

— Óńirlik ózara baılanysty damytýǵa, kólik-logıstıka salasyndaǵy ózara is-qımyldy arttyrýǵa, tikeleı banktik baılanys jáne áýe qatynasy arnalaryn, onyń ishinde júk avıatasymaldaryn jolǵa qoıýǵa, sondaı-aq eki eldiń kedendik, veterınarlyq jáne fıtosanıtarııalyq vedomstvolarynyń qyzmetin úndestirýge erekshe nazar aýdaryldy, - dep habarlady vedomstvodan.

Kezdesýlerdiń qorytyndysy boıynsha D. Han jáne H. Kárim atalǵan josparlarǵa tolyq qoldaý bildirip, Qazaqstan-Pákistan kún tártibiniń barlyq spektri boıynsha yntymaqtastyqty nyǵaıtýǵa jáne ártaraptandyrýǵa jan-jaqty járdem kórsetý nıetin bildirdi.

Buǵan deıin habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dıplomatııalyq qyzmet máseleleri boıynsha ózgerister men tolyqtyrýlar engizý týraly» Zańy qabyldandy.