Qazaqstan men Pákistan keden zańnamasynyń buzylýyna qarsy kúreste yntymaqtastyqty kúsheıtedi
ASTANA. KAZINFORM — Quryltaı Qazaqstan Respýblıkasynyń Úkimeti men Pákistan Islam Respýblıkasynyń Úkimeti arasyndaǵy keden isterindegi yntymaqtastyq jáne ózara ákimshilik kómek týraly kelisimdi ratıfıkatsııalaý jónindegi zańdy eki oqylymda qabyldady.
Qujatqa 2026 jylǵy 4 aqpanda Islamabadta qol qoıylǵan.
— Atalǵan kelisim aqparatpen jedel almasý, qaýip-qaterlerdiń aldyn alý jáne jolyn kesý jónindegi sharalardy kelisý, sondaı-aq turaqty ári tıimdi sharalardy qamtamasyz ete otyryp, quzyretti organdardyń baılanysyn úılestirý maqsatynda ázirlendi. Kelisimdi ratıfıkatsııalaý — ózara baılanystyń quqyqtyq jáne uıymdastyrýshylyq negizderin qalyptastyrýǵa, jáne keden isi salasyndaǵy yntymaqtastyqty der kezinde qamtamasyz etýge, onyń ishinde aqparatpen jedel almasýdy, jáne osy saladaǵy yntymaqtastyq jónindegi sharalardy kelisýge múmkindik beredi, — dedi zańdy tanystyrǵan Qarjy mınıstri Mádı Takıev.
Tolyǵyraq aıtqanda, yntymaqtastyqtyń negizgi baǵyttary keden zańnamasy buzylýynyń aldyn alý, olardy tergeý jáne jolyn kesý boıynsha ózara kómek kórsetýdi, eksporttyq jáne tranzıttik deklaratsııalar, onyń ishinde kúdik týdyratyn deklaratsııalar týraly aqparat almasýdy, sondaı-aq qupııalylyq pen aqparattyq qaýipsizdikti qamtamasyz etýdi qamtıdy.
Sonymen qatar, qyzmetkerlerdi oqytý, biliktiligin arttyrý jáne praktıkalyq tájirıbe almasý úshin ekinshi taraptyń keden organdaryna jiberý múmkindigi qarastyrylǵan.
Ózara is-qımyl «suranys-jaýap» formatynda júzege asyrylady.
Qujatty iske asyrý keden isi salasyndaǵy yntymaqtastyq deńgeıin jetildirýge, sondaı-aq Qazaqstan men Pákistan arasyndaǵy ekonomıkalyq baılanystardy damytý jáne tranzıttik-logıstıkalyq áleýetti nyǵaıtý jónindegi sharalardyń tıimdiligin arttyrýǵa jol ashady.
Aıta keteıik, buǵan deıin Qazaqstan Pákistan porttaryna shyǵatyn jańa temirjol baǵytyn damytýǵa qatysatynyn jazǵanbyz.
