Qazaqstan men Pákistan ǵylym jáne bilim salasyndaǵy baılanysty odan ári damytýǵa ýaǵdalasty

ISLAMABAD. KAZINFORM – Bul týraly Memleket basshysy Qasym Jomart Toqaev Pákistan Premer-mınıstri Shahbaz Sharıfpen júrgizgen kelissózderiniń qorytyndysy boıynsha BAQ ókilderiniń aldynda sóılegen sózinde málim etti.

Memleket basshysy Qazaqstan-Pákistan bıznes-forýmyna qatysatyndaryn, jıynda eki eldiń 250-den asa kompanııa jetekshileri bas qosyp, birqatar kommertsııalyq qujatqa qol qoıylatynyn jetkizdi.

– Bul mańyzdy is-shara nátıjeleri ózara saýda-ekonomıkalyq jáne ınvestıtsııalyq qatynastarǵa tyń serpin beretinine senemin. Sondaı-aq eki eldiń mádenı-gýmanıtarlyq yntymaqtastyǵyn damytý máselesin talqyladyq. Elimizdiń joǵary oqý oryndarynyń tanymaldylyǵy Pákistan jastary arasynda jyldan jylǵa artyp keledi. Qazirgi ýaqytta Qazaqstanda myńnan asa pákistandyq stýdent túrli mamandyqtar boıynsha bilim alýda. Osy rette ǵylym jáne bilim salasyndaǵy baılanysty odan ári damytýǵa ýaǵdalastyq. Islamabad ýnıversıtetterinde búgin ashylǵan «ál-Farabı», «Sátpaev» jáne «ıAsaýı» ortalyqtary eki eldiń ǵylym jáne oqý-aǵartý salalaryndaǵy yqpaldastyǵyn nyǵaıtatyn bolady, – dedi Memleket basshysy.

Qasym-Jomart Toqaev densaýlyq saqtaý jáne sport baǵyttary boıynsha ózara is-qımyldy kúsheıtý mańyzdy ekenine mán berdi.

– Búgin biz Qazaqstan-Pákistan «Dostyq» sport keshenin saltanatty túrde ashtyq. Atalǵan sport ortalyǵynda qazaq kúresi, toǵyzqumalaq sııaqty qazaqtyń ulttyq sport túrleri oqytylady. Sondaı-aq shahmat, boks, aralas jekpe-jek boıynsha dárister uıymdastyrylady. Turaqty túrde mádenı jáne sporttyq is-sharalar ótkizý baǵdarlamasyn qabyldadyq. Bul qadam qos halyqtyń bir-birin jaqynyraq tanýyna septigin tıgizedi dep senemin, – dedi Prezıdent.

Aıta keteıik, osyǵan deıin Qasym-Jomart Toqaev Premer-mınıstr Shahbaz Sharıfke alǵys aıtyp, Pákistan halqyna rızashylyǵyn bildirgenin jazǵan edik.