Qazaqstan men Pákistan dárigerlerdi birlesip daıarlaıdy
ALMATY. KAZINFORM — Qazirgi tańda Astana medıtsına ýnıversıteti Pákistannyń jetekshi medıtsınalyq ýnıversıtetterimen jáne klınıkalarymen yntymaqtastyq ornatqan.
Qazaqstan men Pákistan medıtsınalyq bilim berý salasyndaǵy yntymaqtastyqty jańa deńgeıge kóterýde. Qazaqstan Respýblıkasy Densaýlyq saqtaý mınıstrliginiń qoldaýymen Astana medıtsına ýnıversıteti men Pákistannyń Bilim berýdi maqsatty qarjylandyrý qory (PAK-EEF) ózara túsinistik týraly memorandýmǵa qol qoıdy. Bul qujat bolashaq dárigerler men meıirgerlerdi halyqaralyq standarttarǵa saı daıarlaýǵa, birlesken ǵylymı jobalardy damytýǵa jáne akademııalyq almasýdy keńeıtýge múmkindik beredi.
Yntymaqtastyqtyń jańa múmkindikteri týraly Qazaqstan Respýblıkasynyń Densaýlyq saqtaý mınıstri Aqmaral Álnazarova Pákistan Islam Respýblıkasy Federaldyq bilim berý jáne kásiptik daıarlaý jónindegi memlekettik mınıstri Vadjıha Kamarmen kezdesý barysynda málimdedi.
— Biz halyqaralyq yntymaqtastyqty jańa býyn mamandaryn daıarlaýdyń mańyzdy tetikteriniń biri retinde qarastyramyz. Búginde qazaqstandyq medıtsına ýnıversıtetteri álemdik bilim berý keńistigine belsendi kirigip, ǵylymı yntymaqtastyqty damytyp, jetekshi sheteldik joǵary oqý oryndarymen birlesken jobalardy júzege asyrýda, — dep atap ótti Aqmaral Álnazarova.
Kezdesý barysynda ekijaqty qarym-qatynasty damytýdaǵy mańyzdy kezeńderdiń biri retinde Qazaqstan Prezıdenti Qasym-Jomart Toqaevtyń Pákistannyń Bilim berýdi maqsatty qarjylandyrý qoryna gýmanıtarlyq grant bólý týraly sheshimi ataldy. Bul bastama eki el arasyndaǵy strategııalyq áriptestiktiń nyǵaıýynyń aıqyn kórinisi bolyp, bilim berý, ǵylym jáne densaýlyq saqtaý salalaryndaǵy yntymaqtastyqty keńeıtýge jańa múmkindikter ashty.
Qazirgi tańda Astana medıtsına ýnıversıteti Pákistannyń jetekshi medıtsınalyq ýnıversıtetterimen jáne klınıkalarymen yntymaqtastyq ornatqan. PAK-EEF qorymen memorandýmǵa qol qoıý osy áriptestikti jańa deńgeıge kóterýge múmkindik beredi.
Qujat dárigerler men meıirgerlerdi daıarlaý baǵdarlamalaryn damytýǵa, stýdentter men oqytýshylardyń akademııalyq utqyrlyǵyn keńeıtýge, sarapshylardyń arasynda tájirıbe almasýǵa, birlesken ǵylymı zertteýler júrgizýge jáne mamandardyń biliktiligin arttyrýǵa baǵyttalǵan.
— Astana medıtsına ýnıversıtetiniń zamanaýı bilim berý jáne klınıkalyq bazasy, bilikti professor-oqytýshylar quramy jáne halyqaralyq jobalardy iske asyrýdaǵy mol tájirıbesi bar. Bul mamandardy álemdik úzdik standarttarǵa sáıkes daıarlaýǵa múmkindik beredi, — dep túıindedi Aqmaral Álnazarova.
Aıta ketelik densaýlyq saqtaý resýrstaryn basqarýdyń biryńǵaı tsıfrlyq platformasy iske qosyldy.
