Qazaqstan men Pákistan bilim berý salasyndaǵy áriptestikti nyǵaıtpaq
ASTANA. KAZINFORM — Qazaqstannyń Pákistandaǵy elshisi Erjan Qystafın Pákistannyń jetekshi joǵary oqý oryndarynyń biri — «Zamanaýı tilder ulttyq ýnıversıtetine» (National University of Modern Languages — NUML) baryp, ýnıversıtet rektory Shahıd Mahmýd Kaıanımen kezdesý ótkizdi.
Syrtqy ister mınıstrligi baspasóz qyzmetiniń málimetinshe, kezdesý barysynda taraptar Qazaqstan Prezıdenti Qasym-Jomart Toqaevtyń bıylǵy 3-4 aqpanda Pákistanǵa jasaǵan memlekettik saparynyń qorytyndylaryn, sondaı-aq bilim berý salasynda qol jetkizilgen ýaǵdalastyqtardy talqylady.
NUML basshysy ýnıversıtettiń búgingi tańda Qazaqstannyń birqatar jetekshi joǵary oqý oryndarymen baılanys ornatqanyn jáne akademııalyq baılanystardy nyǵaıtý, sondaı-aq kópqyrly yntymaqtastyqty damytý baǵytynda belsendi jumys júrgizilip jatqanyn qanaǵattanýshylyqpen atap ótti.
Sonymen qatar, Qazaqstan men Pákistan joǵary oqý oryndary arasyndaǵy yntymaqtastyqty odan ári nyǵaıtýǵa baǵyttalǵan perspektıvaly baǵyttar men jobalar qarastyryldy.
Kelissózder qorytyndysy boıynsha NUML delegatsııasynyń Qazaqstanǵa saparyn uıymdastyrý týraly ýaǵdalastyqqa qol jetkizildi.
Budan buryn Memleket basshysy Pákistan Premer-mınıstrimen telefon arqyly sóıleskenin jazǵanbyz.