Qazaqstan men Pákistan arasyndaǵy saýda 2,5 ese ósti
ASTANA. KAZINFORM — Qazaqstan men Pákistan ózara saýda kólemin 1 mlrd AQSh dollaryna deıin arttyryp, 40 túrli taýar jetkizýge daıyn. Bul týraly Saýda jáne ıntegratsııa mınıstrliginiń baspasóz qyzmeti habarlady.
8 qyrkúıekte Islamabad qalasynda Saýda jáne ıntegratsııa mınıstri Arman Shaqqalıev pen Pákistan Islam Respýblıkasynyń Federaldy saýda mınıstri Djam Kamal Han arasynda kezdesý ótti.
Kelissóz barysynda taraptar Qazaqstan men Pákistan arasyndaǵy saýda-ekonomıkalyq yntymaqtastyqtyń qazirgi jaı-kúıi men damý perspektıvalaryn, sondaı-aq Qazaqstan Respýblıkasy Prezıdenti Qasym-Jomart Toqaevtyń bıylǵy qarasha aıynda Islamabadqa jasaıtyn resmı saparyna daıyndyq máselelerin talqylady.
— 2025 jyldyń alǵashqy 7 aıynyń qorytyndysy boıynsha Qazaqstan men Pákistan arasyndaǵy ózara saýda kólemi 89,6 mln AQSh dollary boldy, bul ótken jyldyń sáıkes kezeńimen salystyrǵanda 2,5 ese joǵary (36,3 mln AQSh dollary). Qazaqstan eksporty 7,2 ese ósip, 55,5 mln AQSh dollary boldy, al ımport 19,3%-ǵa ósip, 34,1 mln AQSh dollaryna jetti.
Qazaqstannan Pákistanǵa eksporttalatyn negizgi taýarlarǵa shıki munaı, keptirilgen burshaq daqyldary, dándi daqyldar, sondaı-aq mashınalar men jabdyqtar jatady. Pákistannan Qazaqstanǵa ımporttyń negizgi bóligin azyq-túlik ónimderi (kartop — 27,1%, tsıtrýs jemisteri — 18,8%), kıim jáne toqyma buıymdary (25%), dári-dármekter (11,3%) quraıdy, — delingen Saýda jáne ıntegratsııa mınıstrliginiń habarlamasynda.
Mınıstr Arman Shaqqalıev Qazaqstan men Pákistan ózara saýda kólemin 1 mlrd AQSh dollaryna deıin jetkizý jóninde bıik maqsat qoıyp otyrǵanyn atap ótip, munaı-hımııa, metallýrgııa, mashına jasaý jáne farmatsevtıka salalaryn qosa alǵanda, 40 taýar pozıtsııasy boıynsha jetkizilimderin arttyrýǵa daıyn ekenin bildirdi.
2025–2027 jyldarǵa arnalǵan saýda-ekonomıkalyq yntymaqtastyq jónindegi Jol kartasyn iske asyrýǵa erekshe nazar aýdaryldy. Bul qujat bıylǵy sáýir aıynda qol qoıylǵan. Qazaqstandyq tarap áriptesterdi qujattaǵy is-sharalardy naqty júzege asyrýǵa belsendi qatysýǵa shaqyrdy. Sondaı-aq taraptar elektrondy saýda salasyndaǵy yntymaqtastyqtyń mańyzdylyǵyn atap ótti. Bul baǵyt aıtarlyqtaı ósim áleýetine ıe.
QR Prezıdentiniń Islamabadqa sapary qarsańynda «Made in Kazakhstan and Pakistan» taýar óndirýshiler kórmesin jáne Qazaqstan-Pákistan bıznes-forýmyn ótkizý josparlanyp otyr. Taraptar is-shara baǵdarlamasy, kezdesýler formaty jáne qatysýshylar quramy boıynsha birlesken daıyndyqty bastap ketti.
Yntymaqtastyqtyń mańyzdy baǵyty — tranzıttik saýda týraly kelisimge qol qoıý. Bul kelisimniń jobasy qazirdiń ózinde kelisilip, qarasha aıynda qol qoıýǵa daıyndalyp jatyr
Óz kezeginde Pákistan tarapy Karachı qalasyndaǵy kórmede qazaqstandyq delegatsııanyń jetistikterin joǵary baǵalap, isker toptar arasyndaǵy baılanystardy damytý jáne aýyl sharýashylyǵy, ónim óńdeý, densaýlyq saqtaý, bilim berý, akkredıtteý jáne sertıfıkattaý salalarynda yntymaqtastyqty keńeıtýdiń mańyzdylyǵyn atap ótti.
Mınıstr Djam Kamal Han Pákistanda júrgizilip jatqan ekonomıkalyq reformalar týraly aıtyp ótti. Olardyń qatarynda qaıta qarjylandyrý mólsherlemesiniń tómendeýi, ónerkásiptik óndiristiń ósýi, arnaıy ekonomıkalyq aımaqtardyń damýy, sondaı-aq aýyl sharýashylyǵynda tehnologııalardy engizý bar.
Geologııalyq barlaý jáne taý-ken óndirisi, toqyma ónerkásibi, IT jáne jasandy ıntellekt salalarynda, sondaı-aq kadr daıarlaý baǵytynda yntymaqtastyqtyń bolashaǵyna erekshe nazar aýdaryldy.
Kezdesý qorytyndysy boıynsha mınıstrler Qazaqstan Prezıdentiniń Islamabadqa aldaǵy sapary ekijaqty yntymaqtastyqty damytýǵa jáne eki el arasyndaǵy saýda-ekonomıkalyq baılanystardy nyǵaıtýǵa tyń serpin beretinine senim bildirdi.
Aıta ketelik azyq-túliktiń 11 túrine baǵanyń eń tómengi deńgeıi engizilmek.