Qazaqstan men Pákistan $645 mln-ǵa saýda kólemin arttyrýdy kózdep otyr
ASTANA. KAZINFORM — Qazaqstan men Pákistan saýda-ekonomıkalyq baılanystardy keńeıtip, jańa kólik dálizderin damytýǵa nıetti. Almatyda ótken kezdesýde taraptar besjyldyq Jol kartasyn aıaqtaý, Pákistan porttaryna shyǵatyn temirjol baǵytyn iske asyrý jáne tikeleı áýe qatynasyn qalpyna keltirý máselelerin talqylady. Bul týraly Ulttyq ekonomıka mınıstrligi málimdedi.
Almatyda Ortalyq Azııadaǵy ekonomıkalyq yntymaqtastyq jónindegi ekinshi Tıan-Shan forýmy aıasynda Premer-mınıstrdiń orynbasary – ulttyq ekonomıka mınıstri Serik Jumanǵarın Pákistannyń Federaldyq ınvestıtsııalar jónindegi mınıstri Kaıser Ahmed Sheıhpen kezdesti.
Kezdesýde eki el arasyndaǵy saýda-ekonomıkalyq yntymaqtastyqty nyǵaıtý, ınvestıtsııa tartý jáne kólik-logıstıka baılanysyn damytý máseleleri qaraldy.
Taraptar saýda-ekonomıkalyq yntymaqtastyqty keńeıtýge arnalǵan besjyldyq Jol kartasyn túpkilikti pysyqtaý jáne onyń oryndalýyn úılestiretin joǵary deńgeıdegi jumys tobyn qurý jóninde kelisti. Jumys tobyna Qazaqstan tarapynan Serik Jumanǵarın, al Pákistan tarapynan mınıstr Ahsan Ikbal jetekshilik etedi. Qazaqstan jaqyn ýaqytta top quramyn jasaqtap, alǵashqy otyrysyn ótkizýdi josparlap otyr.
Serik Jumanǵarınniń aıtýynsha, eki el arasyndaǵy saýdany keńeıtýge múmkindik bar. Atap aıtqanda, 218 taýar pozıtsııasy boıynsha ózara saýdany shamamen 645 mln dollarǵa arttyrý áleýeti baǵalanyp otyr.
Bul baǵytta metallýrgııa, mashına jasaý, hımııa ónerkásibi, azyq-túlik jáne munaı-hımııa salalaryndaǵy taýar jetkizilimin ulǵaıtýǵa basymdyq berilmek.
Kezdesýde kólik-logıstıka máselesine de erekshe nazar aýdaryldy. Qazaqstan Ortalyq jáne Ońtústik Azııany baılanystyratyn, sonyń ishinde Pákistannyń teńiz porttaryna shyǵýǵa múmkindik beretin baǵyttardy damytýǵa múddeli.
Osy oraıda taraptar CASA temirjol jobasynyń perspektıvalaryn talqylady. Bıyl 30 qyrkúıekte Qazaqstan, Ózbekstan jáne Birikken Arab Ámirlikteri Qazaqstan, Ózbekstan, Aýǵanstan jáne Pákistan aýmaǵy arqyly ótetin jańa temirjol baǵytyn qurý jónindegi ózara túsinistik týraly memorandýmǵa qol qoıǵan bolatyn. Joba Pákistannyń teńiz porttaryna shyǵýǵa múmkindik berýdi kózdeıdi.
Sonymen qatar Serik Jumanǵarın Qazaqstan men Pákistan arasyndaǵy tikeleı áýe qatynasyn qalpyna keltirýdiń mańyzyn atap ótti. Onyń aıtýynsha, bul iskerlik, týrıstik jáne gýmanıtarlyq baılanystardy damytýǵa yqpal etedi.
Buǵan deıin Qazaqstan men Reseıdiń Lenıngrad oblysynyń taýar aınalymy 257,9 mln dollarǵa jetkenin jazdyq.
