Qazaqstan men Pákistannyń áskerı qyzmetshileri yntymaqtastyqtyń jańa múmkindikterin qarastyrdy

ASTANA. QazAqparat - 1 naýryz kúni QR QK Áskerı-teńiz kúshteriniń bas qolbasshysy kontr-admıral Jandarbek Janzaqov pen Pákistan QK ÁTK shtabtyq kolledji delegatsııasynyń basshysy kommador Sájıd Mahmud Shahzadanyń kezdesýi barysynda áskerı bilim berý jáne kadrlardy daıarlaý aıasyndaǵy yntymaqtastyq talqylandy. Bul týraly QR Qorǵanys mınıstrliginiń baspasóz qyzmetinen habarlandy. 

«Qazaqstandyq tarap tájirıbe almasý, personaldy oqytý, halyqaralyq áskerı jarystar men oqý-jattyǵýlarǵa qatysý jónindegi birlesken kúsh-jigerdi óristetýge nıetti», - dedi sóz sóıleýinde kontr-admıral Jandarbek Janzaqov. Qazaqstan men Pákistannyń áskerı yntymaqtastyǵyn damytýdaǵy mańyzdy baǵyt áskerı bilim berý bolyp tabylady. Búginde qazaqstandyq áskerı qyzmetshilerdiń Pákistan Islam Respýblıkasynyń oqý oryndarynda, Qurlyq áskerleriniń Áskerı akademııasynda, Ulttyq qorǵanys kolledjinde jáne t.b. bilim alýlaryna múmkindikteri bar. Óz kezeginde, QR Tuńǵysh Prezıdenti - Elbasy atyndaǵy Ulttyq qorǵanys ýnıversıteti jyl saıyn tanystyrý saparymen Qazaqstan Respýblıkasyna keletin pákistandyq áskerı kolledjderdiń tyńdaýshylaryn qabyldaıdy. Búgingi kúni Qazaqstan men Pákistannyń Qarýly Kúshteri ártúrli baǵyttarda ózara is-áreket jasap júrgenderin aıta ketken jón. Qorǵanys aıasyndaǵy ekijaqty qarym-qatynastyń damýdaǵy áleýeti orasan zor.