Qazaqstan men Pákistan arasyndaǵy tikeleı áýe qatynasy jaqyn arada qalpyna kelýi múmkin

ASTANA. QazAqparat – Qazaqstan Prezıdenti Pákistan Premer-mınıstri Shahbaz Sharıfpen kezdesti, dep habarlaıdy QazAqparat Aqordaǵa silteme jasap.

Áńgimelesý barysynda Qazaqstan men Pákistan arasyndaǵy saýda-ekonomıka jáne ınvestıtsııa salalaryndaǵy yntymaqtastyqtyń perspektıvalary talqylandy.

Qasym-Jomart Toqaev AÓSShK sammıtine qatysý maqsatynda Astanaǵa kelip, uıymdy odan ári ınstıtýtsıonaldy turǵyda damytýǵa baǵyttalǵan elimizdiń bastamalaryn qoldaǵany úshin Pákistannyń Úkimet basshysyna rızashylyǵyn bildirdi.

Prezıdent Pákistandy Qazaqstannyń Ońtústik Azııadaǵy negizgi seriktesteriniń biri dep atady. Sonymen qatar, eki el arasyndaǵy saýda-ekonomıkalyq baılanystardyń damý qarqynyna kóńili tolatynyn aıtty.

Kezdesýde kólik, tranzıttik logıstıka jáne energetıka salalarynda yntymaqtastyq ornatýdyń perspektıvalary qarastyryldy. Eki el arasyndaǵy tikeleı áýe qatynasyn jaqyn arada qalpyna keltirýge, sondaı-aq saýda-ekonomıkalyq, mádenı-gýmanıtarlyq jáne ǵylymı-tehnıkalyq yntymaqtastyq jónindegi úkimetaralyq komıssııanyń jumysyn jandandyrý mańyzdy ekenine nazar aýdaryldy.

Pákistan Premer-mınıstri Shahbaz Sharıf Qasym-Jomart Toqaevqa Pákistan Prezıdenti Arıf Alvıdiń sálemin jetkizip, memleketter arasyndaǵy qarym-qatynastardyń qarqyndy damyp kele jatqanyn atap ótti.

Foto:akorda.kz