Qazaqstan men Pákistan arasyndaǵy saýda aınalymy 28% ósti
ASTANA. QazAqparat - Premer-Mınıstrdiń orynbasary – saýda jáne ıntegratsııa mınıstri Serik Jumanǵarın Pákistan Islam Respýblıkasynyń kommertsııa mınıstri Saıd Navıd Kamarmen kelissóz júrgizdi. Bul týraly QazAqparat primeminister.kz silteme jasap habarlaıdy.
Kezdesý onlaın rejımde ótti, qatysýshylar aýyl sharýashylyǵy salasyndaǵy ekijaqty yntymaqtastyq, Qazaqstannan Pákistanǵa gaz ben kómir jetkizý, bank sektory salasyndaǵy ózara is-qımyl sııaqty keń aýqymdy máselelerdi talqylady. Sondaı-aq taraptar tranzıttik saýda, keden isterindegi yntymaqtastyq jáne ákimshilik ózara kómek týraly úkimetaralyq kelisimder jobalarynyń qyr-syryn qarastyrdy.
Kezdesý sońynda Serik Jumanǵarın Qazaqstannyń ózara tıimdi jáne jemisti yntymaqtastyq ornatýǵa jáne Qazaqstan-Pákistan dıalogyn odan ári keńeıtýge nıetti ekenin atap ótip, syndarly jáne nátıjeli dıalog úshin alǵysyn bildirdi.
2022 jylǵy qańtar-shilde aılarynda Qazaqstan men Pákistan arasyndaǵy aýyl sharýashylyǵy ónimderi men aýyl sharýashylyǵy shıkizatyn qaıta óńdeý ónimderiniń taýar aınalymy $12,6 mln-dy qurady, bul 2021 jylmen salystyrǵanda 28,8%-ǵa artyq ($9,8 mln).
Foto: primeminister.kz
