Qazaqstan men Ózbekstannyń joǵary oqý oryndary áriptestik memorandýmyn jasasty
ASTANA. QazAqparat - Qazaq ulttyq agrarlyq ýnıversıtetiniń rektory, QR UǴA akademıgi Tilektes Espolov bastaǵan delegatsııa Tashkent ırrıgatsııa jáne aýyl sharýashylyǵyn mehanızatsııalaý ınstıtýty basshylyǵynyń shaqyrtýymen Ózbekstanda arnaıy jumys saparymen boldy, dep habarlaıdy atalǵan joǵary oqý ornynyń baspasóz qyzmeti.
Jumys sapary aıasynda ótken kezdesýde Qazaq ulttyq agrarlyq ýnıversıteti, QazUAÝ janyndaǵy Agrotehnologııalyq hab (AgriTech Hub), Tashkent ırrıgatsııa jáne aýyl sharýashylyǵyn mehanızatsııalaý ınstıtýty, Tashkent memlekettik agrarlyq ýnıversıteti birigip tórtjaqty Memorandýmǵa qol qoıdy.
Yntymaqtastyqtyń basty mindeti - eki memleketke de tıimdi birlesken ınnovatsııalyq jobalardy iske asyryp, agrarlyq bilim, ǵylym salasyndaǵy ózara baılanysty nyǵaıtý úshin AgriTech Hub Uzbekistan ortalyǵyn qurý. Bul áriptestik baılanystar Azııa Damý bankiniń qoldaýymen júzege asyrylatyn bolady.
Qazaq ulttyq agrarlyq ýnıversıteti janyndaǵy Agrotehnologııalyq Hab 2015 jyldan beri jumys isteıdi. Onyń qyzmeti - sheteldegi ozyq tehnologııalar men bilimdi tartý jáne ony qazaqstandyq jaǵdaıǵa beıimdeý, ǵylymı-zertteýler nátıjelerin óndiriske engizý, memlekettik-jekeshelik áriptestiktiń quraldaryn tájirıbede qoldaný, agroónerkáisiptik keshenniń basymdy baǵyttaryn damytý.
Habtyń quramyna Qazaqstan-Japon, Qazaqstan-Koreıa, Agroınjenerlik máseleler men energııa únemdeý, Turaqty egin sharýashylyǵy, Azyqtyq ónimderdiń tehnologııasy men sapasy, Sý ınnovatsııalyq ortalyqtary, Qazaqstan-Belarýs agroınjenerlik ınnovatsııalyq ortalyǵy, Innovatsııalyq jylyjaı, Oqý-óndiristik sharýashylyǵy jáne taǵy basqa ǵylymı-zertteý zerthanalary kiredi.
Búgingi kúni QazUAÝ bazasyndaǵy Agrotehnologııalyq habta otandyq agroónerkásiptik keshenge tsıfrly tehnologııalardy engizýge yqpal jasaıtyn Sıtýatsııalyq ortalyq jumys isteıdi. Bul ortalyq sandyq tehnologııalardy ıgergen álemdik deńgeıdegi bilikti mamandardy tartýǵa, tyń ıdeıalar men jańa koomýnıkatsııalyq-aqparattyq tehnologııalardy engizýge, ozyq ınnovatsııalyq tájirıbelerdi almasýǵa jol ashady. Búgingi kúni osy ortalyqta bilimdi jastarymyz ózderiniń jańa ıdeıalary men ǵylymı jobalaryn iske asyrýǵa múmkindik alýda.
2017 jyly ýnıversıtette QR Aýyl sharýashylyǵy mınıstrligi, Azııa Damý banki, AQSh Aýyl sharýashylyǵy mınıstrligi, Islam banki jáne ıÝNESKO qoldaýymen Qazaqstandaǵy jáne Ortalyq Azııa aýmaǵynda sý máselelerin sheshýmen, qurǵaqshylyq, topyraqtyń tuzdanýy syndy ekologııalyq problemalar men ózge de tótenshe jaǵdaılarda jedel áreket etetin Sý haby quryldy.
Jumys sapary barysynda Halyqaralyq semınar ótti. Oǵan jumysyna eki eldiń agrarlyq joǵary oqý oryndarynyń professor-oqytýshylary, ǵylymı qyzmetkerleri, bıyl oqý bitiretin magıstranttary men stýdentteri qatysty.
Ýnıversıtet basshysy, akademık Tilektes Isabaıuly ózbekstandyq áriptesterge oqý ornynyń búgingi jetistikteri men aldaǵy maqsattary týraly, ýnıversıtettiń ǵylymı-bilim berý bazasynda iske asyrylyp jatqan ǵylymı jobalar týraly baıandady. «Qazirgi tańda Qazaq ulttyq agrarlyq ýnıversıtetinde ınnovatsııalyq tehnologııalardy ıgergen bilikti mamandar áleýeti men ǵylymı-ınnovatsııalyq zertteýlerdi álem talaptaryna saı, joǵary deńgeıde júrgizýge múmkindik beretin damyǵan ınfrastrýkrýra qalyptasqan. Osy arqyly biz halyqaralyq baılanystarymyzdy arttyryp, bilim, ǵylym, óndiris ıntegratsııasyn jan-jaqty damytyp otyrmyz» - dep atap ótti ol.
Semınarda sondaı-aq, QazUAÝ janyndaǵy AgriTech Hub Kazakhstan dırektory Marat Beksultanov baıandama jasap Agrohabtyń qyzmeti týraly aqparat berdi.
Kezdesý barysynda taraptar birlesken jobalardy iske asyrý boıynsha usynys-pikirlerin ortaǵa salyp, agrarlyq baǵyttaǵy joǵary oqý oryndary arasyndaǵy baılanystardy jandandyryp, professorlyq-oqytýshylar quramy men stýdentter almasý máselelerin talqylady.
